(న్యూస్ఇన్,తిరుమల)
తిరుమలలో నవరాత్రి బ్రహ్మోత్సవాలకు విస్తృత ఏర్పాట్లు చేయాలని టీటీడీ నిర్ణయం తీసుకుంది.
ఇటీవల ముగిసిన సాలకట్ల బ్రహ్మోత్సవాల్లో ఎదురైన అనుభవాలు, భక్తుల నుంచి వచ్చిన సూచనలను పరిగణనలోకి తీసుకుని ఈసారి ఏర్పాట్లను మరింత మెరుగ్గా చేయాలని టీటీడీ నిర్ణయించింది. అన్ని విభాగాలు సమన్వయంతో పనిచేయాలని టీటీడీ అదనపు ఈవో సి.హెచ్. వెంకయ్య చౌదరి అధికారులను ఆదేశించారు.
నవరాత్రి బ్రహ్మోత్సవాల ఏర్పాట్లపై సమీక్ష నిర్వహించారు.
అధికమాసం కారణంగా ఈ ఏడాది రెండు బ్రహ్మోత్సవాలు జరుగుతున్నాయని వెంకయ్య చౌదరి తెలిపారు. సాలకట్ల బ్రహ్మోత్సవాలు ముగిసిన 17 రోజులకే నవరాత్రి బ్రహ్మోత్సవాలు ప్రారంభం కానున్న నేపథ్యంలో గత అనుభవాలను సమీక్షించుకుని ఏర్పాట్లు చేస్తున్నట్లు చెప్పారు. సాలకట్ల బ్రహ్మోత్సవాలపై సేకరించిన ఫీడ్బ్యాక్లో అన్నప్రసాదం, విద్యుత్, పుష్పాలంకరణ తదితర విభాగాల పనితీరుపై 95 నుంచి 98 శాతం వరకు భక్తులు సంతృప్తి వ్యక్తం చేసినట్లు తెలిపారు.
భక్తుల రద్దీ పెరిగే అవకాశం…
నవరాత్రి బ్రహ్మోత్సవాలకు పూర్తిస్థాయిలో సెలవులు ఉండటంతో ఈసారి భక్తుల రాక పెరిగే అవకాశం ఉందని టీటీడీ అంచనా వేస్తోంది. సాలకట్ల బ్రహ్మోత్సవాల్లో వచ్చిన భక్తుల సంఖ్యను ప్రాతిపదికగా తీసుకుని మరో 20 శాతం అదనపు రద్దీని అంచనా వేస్తూ ఏర్పాట్లు చేయనున్నారు.
సామాన్య భక్తులకు దర్శనంలో ప్రాధాన్యం ఇచ్చే విధానాన్ని కొనసాగించాలని నిర్ణయించారు. సాలకట్ల బ్రహ్మోత్సవాల్లో రోజుకు సగటున 73 వేల మంది మూలమూర్తిని దర్శించుకున్నప్పటికీ, రద్దీని నియంత్రించి దర్శన సమయాన్ని చాలావరకు తగ్గించగలిగామని వెంకయ్య చౌదరి తెలిపారు. సాధారణంగా 5 నుంచి 8 గంటల్లో, గరిష్టంగా 10 గంటల్లోపు దర్శనం పూర్తయ్యేలా చర్యలు తీసుకున్నట్లు చెప్పారు.
భద్రత, వర్షాలపై ప్రత్యేక దృష్టి…
నవరాత్రి బ్రహ్మోత్సవాలకు భద్రతా ఏర్పాట్లను మరింత పటిష్టం చేయనున్నారు. పోలీసు యంత్రాంగంతో సమన్వయ సమావేశం నిర్వహించడంతోపాటు వాహనసేవలు, ఊరేగింపులను నిర్ణీత సమయానికి నిర్వహించేలా చర్యలు తీసుకోనున్నారు. అవసరమైన ప్రాంతాల్లో ఎన్డీఆర్ఎఫ్ సేవలను వినియోగించుకునేలా ప్రణాళిక సిద్ధం చేయాలని అధికారులకు సూచించారు.అక్టోబర్లో వర్షాలు కురిసే అవకాశాన్ని దృష్టిలో ఉంచుకుని ముందస్తు జాగ్రత్తలు, ప్రత్యామ్నాయ ఏర్పాట్లపైనా దృష్టి పెట్టారు. ఎస్వీబీసీ ప్రత్యక్ష ప్రసారాలు, సాంస్కృతిక కార్యక్రమాలు, నాదనీరాజనం నిర్వహణపైనా సమీక్ష జరిగింది.
తిరుమలలో రద్దీ, వాహనాల రాక, పార్కింగ్, అన్నప్రసాదం, భద్రత తదితర అంశాలపై టీటీడీ విడుదల చేసే అధికారిక సమాచారాన్ని భక్తులు అనుసరించాలని వెంకయ్య చౌదరి సూచించారు. అధికారిక సమాచారాన్ని ఆధారంగా చేసుకుని ప్రయాణం, దర్శన ప్రణాళిక రూపొందించుకుంటే ఇబ్బందులు తగ్గుతాయన్నారు.
Leave a Reply