సిరిసిల్లలో కేటీఆర్ పై సీఎం రేవంత్ ఘాటు విమర్శలు...!

(న్యూస్ఇన్‌, సిరిసిల్ల‌)

సిరిసిల్ల‌లో జరిగిన స‌భ‌లో సీఎం రేవంత్ రెడ్డి కేటీఆర్ పై ఘాటైన‌ విమ‌ర్శ‌లు చేశారు. వచ్చే ఎన్నికల్లో కాంగ్రెస్‌ జెండా ఎగరాలని, నియోజకవర్గం నుంచి కాంగ్రెస్‌ అభ్యర్థి గెలిస్తే ఆయనకు మంత్రి పదవి ఇచ్చేలా చూస్తానని ముఖ్యమంత్రి రేవంత్‌రెడ్డి ప్రకటించారు. బీఆర్‌ఎస్‌ పాలనలో సిరిసిల్లలో చేనేత కార్మికులు, వలస కార్మికుల సమస్యలు పరిష్కారం కాలేద‌న్నారు.

కేటీఆర్‌పై సీఎం విమర్శలు…

సిరిసిల్ల చేనేతకు ప్రసిద్ధి చెందిన ప్రాంతమని, అయితే గత బీఆర్‌ఎస్‌ పాలనలో తీసుకున్న నిర్ణయాల‌తో ప్రజల సమస్యలు పరిష్కారం కాలేదని రేవంత్‌రెడ్డి అన్నారు. కేటీఆర్‌ పలుమార్లు సిరిసిల్ల నుంచి ఎమ్మెల్యేగా గెలిచినా చేనేత కార్మికుల ఆత్మహత్యలు, గల్ఫ్‌ దేశాలకు వలసలు ఎందుకు తగ్గలేదని ప్రశ్నించారు.
ఇన్నేళ్లుగా అధికారంలో ఉన్న బీఆర్‌ఎస్‌ సిరిసిల్ల ప్రజలకు ఏం చేసిందో ప్ర‌జ‌లు ఆలోచించాలని కోరారు.

ఆస్తులపై శ్వేతపత్రం ఇవ్వాలని డిమాండ్‌…

కేటీఆర్‌, కేసీఆర్‌, హరీశ్‌రావు, సంతోష్‌రావు ఆస్తులపై శ్వేతపత్రం విడుదల చేయాలని రేవంత్‌రెడ్డి డిమాండ్‌ చేశారు. కేటీఆర్‌ సంపద పెరుగుదలపై కాంగ్రెస్‌ నేతలు గతంలో చేసిన ఆరోపణలను ప్రస్తావించిన ఆయన.. ఆస్తులు ఎలా సమకూరాయో ప్రజలకు వివరించాలని కోరారు.జన్వాడలోని కేటీఆర్‌ ఫామ్‌హౌస్‌తో పాటు హైదరాబాద్‌ పరిసరాల్లోని కొన్ని ఆస్తులు, వ్యాపార సామ్రాజ్యాన్ని స్థాపించుకున్నార‌ని సీఎం ఆరోపించారు. అమెరికా, సింగపూర్‌లో పెట్టుబడులపై కూడా వివరాలు వెల్లడించాలని డిమాండ్‌ చేశారు.

నేరెళ్ల ఘటనను ప్రస్తావించిన రేవంత్‌…

బీఆర్ ఎస్ అధికారంలో ఉన్న స‌మ‌యంలో జ‌రిగిన నేరెళ్ల ఘటనను సీఎం తన ప్రసంగంలో ప్రస్తావించారు. మానేరు ఇసుక తవ్వకాలు, నేరెళ్ల ఘటనలో దళితులు ఎదుర్కొన్న సమస్యలను ప్రస్తావిస్తూ బీఆర్ ఎస్ పై విరుచుకు ప‌డ్డారు. మిడ్‌మానేరు ప్రాజెక్టు కారణంగా ఇళ్లు కోల్పోయిన కుటుంబాల పునరావాసం, చేనేత, గీత కార్మికులు, రైతుల సమస్యలను కూడా ప్రస్తావించారు.

చేనేతకు రూ.1,730 కోట్లు ఖర్చు చేశాం….

తమ ప్రభుత్వం అధికారంలోకి వచ్చిన తర్వాత చేనేత కార్మికుల సంక్షేమం కోసం రూ.1,730 కోట్లు ఖర్చు చేసిన‌ట్లు రేవంత్‌రెడ్డి తెలిపారు. బీఆర్‌ఎస్‌ ప్రభుత్వం పదేళ్లలో సుమారు రూ.2,000 కోట్లు మాత్ర‌మే ఖర్చు చేసిందన్నారు.
బతుకమ్మ చీరల బకాయిలను తమ ప్రభుత్వం చేనేత కార్మికులకు చెల్లించిందన్నారు. రైతు రుణమాఫీ, రైతు భరోసా వంటి పథకాల ద్వారా రైతులను ఆదుకుంటున్నామని చెప్పారు. మహిళలకు ఉచిత బస్సు ప్రయాణం కోసం రెండున్నరేళ్లలో ఆర్టీసీకి రూ.12 వేల కోట్లు చెల్లించామన్నారు.

సిరిసిల్ల అభివృద్ధికి ప్రాధాన్యం…

వేములవాడ అభివృద్ధికి రూ.1,500 కోట్లు కేటాయించామని రేవంత్‌రెడ్డి తెలిపారు. యంగ్‌ ఇండియా స్కూల్‌, ఎంఆర్‌ఓ కార్యాలయాలు, మహిళా పోలీస్‌స్టేషన్ ను త‌మ ప్ర‌భుత్వం ఏర్పాటు చేసింద‌న్నారు.
సిరిసిల్లలో కాంగ్రెస్‌ అభ్యర్థిని గెలిపిస్తే మంత్రి పదవి ఇచ్చేలా చూస్తానని స్పష్టం చేశారు. సిరిసిల్ల అభివృద్ధి బాధ్యతను తానే తీసుకుంటానని మ‌రోసారి ప్ర‌క‌టించారు.

ఎమ్మెల్సీ ఎన్నికలపైనా వ్యాఖ్యలు….

రాబోయే ఎమ్మెల్సీ ఎన్నికల్లో పద్మశాలి సామాజిక వర్గానికి చెందిన వ్యక్తిని పెద్దల సభకు పంపించాలని కాంగ్రెస్‌ రాష్ట్ర అధ్యక్షుడు మహేశ్‌కుమార్‌గౌడ్‌ను కోరుతున్నట్లు రేవంత్‌రెడ్డి తెలిపారు.కేసీఆర్‌ గతంలో ఇచ్చిన దళిత ముఖ్యమంత్రి, దళితులకు మూడెకరాల భూమి, కేజీ నుంచి పీజీ వరకు ఉచిత విద్య, ప్రతి ఇంటికీ ఉద్యోగం వంటి హామీలను ప్రస్తావించిన సీఎం.. వాటిలో ఎన్ని అమలు చేశారో ప్రజలు బీఆర్ ఎస్ నేత‌ల‌ను నిల‌దీయాల‌న్నారు. నేరెళ్ల బాధితులను సాక్షిగా చేసుకుని సిరిసిల్లలో కాంగ్రెస్‌ను బలోపేతం చేయాలని పార్టీ శ్రేణులకు పిలుపునిచ్చారు.