ఏపీలో పెట్టుబడులకు అనుకూల వాతావరణం.. చంద్రబాబు ఆహ్వానం
పారిశ్రామిక రాయితీలు, నైపుణ్యాభివృద్ధికి ప్రాధాన్యం
రేర్ ఎర్త్ మినరల్స్, గ్రీన్ ఎనర్జీపై కీలక చర్చలు
(విశాఖపట్నం,న్యూస్ఇన్‌)
ఆంధ్రప్రదేశ్‌లో పారిశ్రామిక పెట్టుబడులకు అనుకూల వాతావరణం కల్పిస్తున్నామని ముఖ్యమంత్రి చంద్రబాబు నాయుడు తెలిపారు. పరిశ్రమలకు పారదర్శకంగా రాయితీలు అందించేందుకు ఎస్క్రో అకౌంట్ విధానం ప్రవేశపెట్టామని, స్పీడ్ ఆఫ్ డూయింగ్ బిజినెస్‌కు ప్రాధాన్యం ఇస్తున్నామని వెల్లడించారు. విశాఖపట్నంలో జపాన్ రాయబారి కెయిచీ ఓనోతో జరిగిన సమావేశంలో పెట్టుబడులు, నైపుణ్యాభివృద్ధి, కీలక ఖనిజాలు, ఉక్కు, గ్రీన్ ఎనర్జీ రంగాలపై చర్చించారు.రాష్ట్రంలో యువతకు పరిశ్రమల అవసరాలకు అనుగుణంగా శిక్షణ అందించేందుకు జపాన్ సంస్థలు సహకరించాలని సీఎం కోరారు. దీనికి సానుకూలంగా స్పందించిన జపాన్ ప్రతినిధులు స్థానిక పరిశ్రమల్లో పనిచేసే ఉద్యోగులకు నైపుణ్య శిక్షణ ఇచ్చేందుకు సంసిద్ధత వ్యక్తం చేశారు.
రేర్ ఎర్త్ మినరల్స్ సరఫరాపై దృష్టి…
జపాన్‌కు రేర్ ఎర్త్ మినరల్స్ సరఫరాను స్థిరంగా కొనసాగించే అంశంపై చర్చించారు. ఆర్సెలార్ మిట్టల్-నిప్పన్ స్టీల్ ప్లాంట్‌కు అవసరమైన సెమీ ఫినిష్డ్ ఉక్కు ఉత్పత్తుల దిగుమతికి సహకరించాలని జపాన్ ప్రతినిధులు కోరారు. ప్రొటీరియల్ ఇండియా సంస్థ శ్రీసిటీలో అమార్ఫస్ మెటల్ తయారీ యూనిట్‌ను 2026 డిసెంబరులో ప్రారంభించేందుకు ప్రణాళిక సిద్ధం చేసినట్లు వెల్లడించింది.
గ్రీన్ అమ్మోనియాకు ఒప్పందం….
భారత్-జపాన్ సహకారంతో విశాఖలో గ్లోబల్ కేపబిలిటీ సెంటర్ (జీసీసీ) ప్రారంభించినట్లు ప్రతినిధులు తెలిపారు. మరోవైపు కాకినాడ నుంచి ఐదేళ్లపాటు ఏటా 70 వేల టన్నుల గ్రీన్ అమ్మోనియా కొనుగోలుకు జపాన్‌కు చెందిన జెరా సంస్థ, ఏఎం గ్రీన్‌తో ప్రాథమిక ఒప్పందం కుదుర్చుకున్నట్లు వెల్లడించారు.