గురుకుల విద్యార్థుల కిట్ల సరఫరాలో జాప్యం.. మఫత్లాల్ సంస్థకు మంత్రి అడ్లూరి హెచ్చరిక

-ఈ నెల 16లోగా పెండింగ్ వస్తువులన్నీ అందించాలి
-లేదంటే టెండర్ నిబంధనల ప్రకారం చర్యలు

(హైదరాబాద్, న్యూస్ఇన్)

తెలంగాణలోని గురుకులాలు, ప్రభుత్వ వసతి గృహాలు, కేజీబీవీలు, ఇతర ప్రభుత్వ విద్యాసంస్థల్లో విద్యార్థులకు అవసరమైన నిత్యావసర సరుకులు, విద్యా సామగ్రి, స్టూడెంట్ కిట్ల సరఫరాలో జాప్యంపై రాష్ట్ర సాంఘిక సంక్షేమ శాఖ మంత్రి అడ్లూరి లక్ష్మణ్ కుమార్ తీవ్ర అసంతృప్తి వ్యక్తం చేశారు. నిర్ణీత గడువులోగా అన్ని వస్తువులను సరఫరా చేయాలని, లేనిపక్షంలో టెండర్ నిబంధనల ప్రకారం కఠిన చర్యలు తీసుకుంటామని హెచ్చరించారు. ఎస్సీ, ఎస్టీ విద్యార్థుల సంక్షేమంలో నిర్లక్ష్యాన్ని ఎంతమాత్రం సహించబోమని స్పష్టం చేశారు.డాక్టర్ బీఆర్ అంబేద్కర్ తెలంగాణ రాష్ట్ర సచివాలయంలో గురుకుల విద్యాసంస్థలకు ప్రాజెక్ట్ మానిటరింగ్ యూనిట్ (పీఎంయూ) ద్వారా జరుగుతున్న సరుకులు, విద్యార్థుల కిట్లు, ఇతర సామగ్రి సరఫరాపై మంత్రి సమీక్ష నిర్వహించారు. వివిధ శాఖల ఉన్నతాధికారులతో సరఫరా పురోగతి, పెండింగ్ వస్తువులు, నాణ్యత, క్షేత్రస్థాయి పర్యవేక్షణపై చర్చించారు.

మఫత్లాల్ సంస్థకు డెడ్‌లైన్….

ఆగస్టులోనే టెండర్లు ఖరారు చేసి ఆర్డర్లు ఇచ్చినప్పటికీ, విద్యాసంస్థలు పంపిన ఇండెంట్లకు అనుగుణంగా సరుకులు పూర్తిస్థాయిలో అందకపోవడంపై మంత్రి అసహనం వ్యక్తం చేశారు. ముఖ్యంగా మఫత్లాల్ సంస్థ సరఫరాలో వెనుకబడటాన్ని తప్పుబట్టారు. ప్రస్తుతం సుమారు 2,000 జతల రెండో విడత తెల్ల సాక్సులు, 3,000 ట్రంకు పెట్టెలు పెండింగ్‌లో ఉన్నట్లు సమీక్షలో వెల్లడైంది.పెండింగ్‌లో ఉన్న వస్తువులన్నింటినీ నవంబర్ 16లోగా సరఫరా చేస్తామని సంస్థ ప్రతినిధులు మంత్రికి హామీ ఇచ్చారు. గడువులోగా సరఫరా పూర్తి చేయకపోతే ఒప్పంద నిబంధనల ప్రకారం చర్యలు తీసుకోవాలని పీఎంయూ ఛైర్మన్‌ను మంత్రి ఆదేశించారు.

నాణ్యతపై అధికారులదే బాధ్యత….

గురుకులాలకు చేరుతున్న ప్రతి వస్తువు నాణ్యతను క్షుణ్ణంగా పరిశీలించాలని మంత్రి సూచించారు. సరుకులను తనిఖీ చేసి ధ్రువీకరించే అధికారులు ఎవరు? వాటి స్వీకరణ, నిల్వ, పంపిణీ బాధ్యతలు ఎవరికి అప్పగించారు? అనే వివరాలతో నివేదిక ఇవ్వాలని అన్ని శాఖల అధిపతులను ఆదేశించారు. ఆర్డర్లు ఇవ్వడంతోనే బాధ్యత ముగియదని, విద్యార్థులకు వస్తువులు చేరాయో లేదో క్షేత్రస్థాయిలో నిర్ధారించాలని స్పష్టం చేశారు.

జిల్లాల వారీగా పర్యవేక్షణ.. బఫర్ స్టాక్ తప్పనిసరి…

గురుకులాల్లో సరుకుల కొరత రాకుండా ముందస్తుగా బఫర్ స్టాక్ నిర్వహించాలని మంత్రి ఆదేశించారు. ప్రతి జిల్లాకు నోడల్ అధికారిని నియమించి సరఫరా, నిల్వలు, పంపిణీని నిరంతరం పర్యవేక్షించాలని సూచించారు. అధికారులు పాఠశాలలను ప్రత్యక్షంగా సందర్శించి ఇండెంట్లకు అనుగుణంగా సరుకులు అందుతున్నాయో లేదో తనిఖీ చేయాలన్నారు.నవంబర్ 25లోగా సరఫరా పురోగతిపై సమగ్ర నివేదిక సమర్పించాలని ఆదేశించారు. విద్యార్థులకు నాణ్యమైన భోజనం, అవసరమైన నిత్యావసరాలు సకాలంలో అందాలని, ఎస్సీ, ఎస్టీ విద్యార్థుల ఆహారం, ఆరోగ్యం, విద్య, వసతి విషయంలో ఎలాంటి నిర్లక్ష్యం ఉండకూడదని మంత్రి స్పష్టం చేశారు.

ఈ సమావేశంలో సాంఘిక సంక్షేమ గురుకులాల కార్యదర్శి, పీఎంయూ ఛైర్మన్ గుగులోతు రవి, గిరిజన సంక్షేమ గురుకులాల కార్యదర్శి సీతాలక్ష్మి, ప్రభుత్వ ప్రత్యేక కార్యదర్శి బి.ఎల్. సంతోష్, పీఎంయూ కాంట్రాక్టర్లు తదితరులు పాల్గొన్నారు.