క్రీడ‌లుక్రైం - లీగ‌ల్తెలంగాణా

తెలంగాణ గ్రేహౌండ్స్‌ దేశానికే ఆదర్శం:డీజీపీ సీవీ ఆనంద్‌

  • రాజేంద్రనగర్‌లో గ్రేహౌండ్స్‌ షూటింగ్‌ హౌస్‌ ప్రారంభం
  • జాతీయ కమాండో పోటీల్లో ప్రథమ స్థానం ద‌క్కించుకోవాలి

(న్యూస్‌ఇన్‌, క్రైంబ్యూరో)

తెలంగాణ గ్రేహౌండ్స్‌ దేశ పోలీసు వ్యవస్థకే ఆదర్శంగా నిలుస్తోందని డీజీపీ సీవీ ఆనంద్‌ అన్నారు. నక్సలిజం, ఉగ్రవాదం, హైజాకింగ్‌ వంటి ముప్పులను ఎదుర్కోవడంలో గ్రేహౌండ్స్‌, ఆక్టోపస్‌ దళాలు కీలక పాత్ర పోషిస్తున్నాయని పేర్కొన్నారు. రాజేంద్రనగర్‌లో శనివారం నూతనంగా ఏర్పాటు చేసిన గ్రేహౌండ్స్‌ షూటింగ్‌ హౌస్‌ను ఆయన ప్రారంభించారు.

ఈ సందర్భంగా డీజీపీ మాట్లాడుతూ.. 1980వ దశకం నుంచి నక్సల్స్‌ కార్యకలాపాలను అణచివేయడంలో గ్రేహౌండ్స్‌ విశేష సేవలు అందించిందని గుర్తుచేశారు. దేశంలోని పలు రాష్ట్రాలు కూడా తెలంగాణ గ్రేహౌండ్స్‌ తరహాలో ప్రత్యేక దళాలను ఏర్పాటు చేసుకోవడం ఈ బలగాల సామర్థ్యానికి నిదర్శనమన్నారు. ఇటీవల గుజరాత్‌లోని కెవాడియాలో జరిగిన జాతీయ ఏక్తా దివస్‌ కార్యక్రమంలో తెలంగాణ గ్రేహౌండ్స్‌ ప్రదర్శించిన కవాతుకు మంచి ప్రశంసలు లభించాయని తెలిపారు.

సిబ్బంది సంఖ్య 700 మందికి తగ్గకుండా ఉండాలని, శిక్షణ, క్రమశిక్షణ, అంకితభావంతో విధులు నిర్వర్తించాలని సూచించారు. అటవీ ప్రాంతాల్లో నిరంతర సాధనతోపాటు శారీరక దృఢత్వం, వృత్తి నైపుణ్యాలను పెంపొందించుకోవాలన్నారు. ఎలాంటి అత్యవసర పరిస్థితులనైనా ఎదుర్కొనేందుకు ఎల్లప్పుడూ సిద్ధంగా ఉండాలని పిలుపునిచ్చారు.

రాజస్థాన్‌లోని జోధ్‌పూర్‌లో 2027 ఫిబ్రవరి 2 నుంచి జరగనున్న ఆల్‌ ఇండియా పోలీస్‌ కమాండో పోటీల్లో తెలంగాణ గ్రేహౌండ్స్‌ జట్టు ప్రథమ స్థానం సాధించాలని ఆకాంక్షించారు. గత పోటీల్లో నాలుగో స్థానం సాధించామని డీజీ ఆపరేషన్స్‌ డాక్టర్‌ అనిల్‌కుమార్‌ వివరించారు. శారీరక దృఢత్వం, ఫైరింగ్‌ నైపుణ్యాలపై ప్రత్యేక శిక్షణ ఇస్తున్నట్లు తెలిపారు.

అమరవీరుల పేరుతో షూట్‌ హౌస్‌….

సందీప్‌, పవన్‌, శ్రీధర్‌ అమరవీరుల త్యాగాలకు గుర్తుగా ఈ షూట్‌ హౌస్‌కు ‘SPS OODA షూట్‌ హౌస్‌’ అని నామకరణం చేశారు. పరిశీలన, పరిస్థితుల అంచనా, నిర్ణయం, చర్య అనే నాలుగు సూత్రాలకు ప్రతీకగా OODA భావనను ఇందులో అనుసంధానించారు. క్లిష్ట పరిస్థితుల్లో వేగంగా స్పందించే సామర్థ్యాన్ని పెంపొందించడమే దీని ప్రధాన ఉద్దేశం.

Leave a Reply

Your email address will not be published. Required fields are marked *