భారత్ సమ్మిట్ అట్టర్ ఫ్లాప్.. రాహుల్ మధ్యలోనే వెళ్లిపోయారు: బండి సంజయ్
-కాంగ్రెస్ను దేశ ప్రజలే కాదు.. విదేశీయులు కూడా పట్టించుకోవడం లేదు
-భారత్ వ్యతిరేక శక్తులతో కలిసి తెలంగాణను అపవిత్రం చేశారు
(హైదరాబాద్, న్యూస్ఇన్)
హైదరాబాద్లో నిర్వహించిన భారత్ సమ్మిట్ పూర్తిగా విఫలమైందని కేంద్ర మంత్రి బండి సంజయ్ కుమార్ విమర్శించారు. సమ్మిట్కు వచ్చిన రాహుల్ గాంధీ కూడా మధ్యలోనే వెళ్లిపోయారని అన్నారు. దేశ ప్రజలే కాదు.. విదేశీయులు కూడా కాంగ్రెస్ పార్టీని పట్టించుకోవడం లేదని ఎద్దేవా చేశారు. భారత్ సమ్మిట్పై ఆయన హైదరాబాద్లో వీడియో విడుదల చేసి కాంగ్రెస్ నాయకత్వంపై తీవ్ర విమర్శలు చేశారు.దేశంలో ఏవైనా సమస్యలు ఉంటే వాటిని మన దేశంలోనే చర్చించుకోవాలని, విదేశాల ముందు దేశాన్ని కించపరిచేలా మాట్లాడటం సరైన పద్ధతి కాదని బండి సంజయ్ అన్నారు. విదేశీ ప్రతినిధుల ముందు దేశ ప్రతిష్టను తగ్గించే ప్రయత్నం చేయడం దేశద్రోహంతో సమానమని విమర్శించారు. దేశభక్తులకు, పోరాట యోధులకు వేదికగా ఉండాల్సిన తెలంగాణలో భారత్ వ్యతిరేక శక్తులతో కలిసి కార్యక్రమాలు నిర్వహించడం సరికాదన్నారు.
కాంగ్రెస్ ప్రజాస్వామ్యం గురించి మాట్లాడుతుందా?

ప్రజాస్వామ్యం గురించి రాహుల్ గాంధీ మాట్లాడటం విడ్డూరంగా ఉందని బండి సంజయ్ అన్నారు. ఒకే కుటుంబం దశాబ్దాల పాటు దేశాన్ని పాలించడం, ఒకే కుటుంబం పార్టీని తన చెప్పుచేతల్లో పెట్టుకోవడమే కాంగ్రెస్ చెప్పే ప్రజాస్వామ్యమా అని ప్రశ్నించారు. ఎమర్జెన్సీ విధించి రాజ్యాంగ హక్కులను కాలరాసిన కాంగ్రెస్ ఇప్పుడు ప్రజాస్వామ్యం గురించి మాట్లాడటం హాస్యాస్పదమన్నారు. 1984లో సిక్కుల ఊచకోత జరిగినప్పుడు ఫాసిజం గుర్తుకు రాలేదా అని నిలదీశారు.
కౌలు రైతుల హామీలపై ప్రశ్నలు
2014 ఎన్నికల్లో బీజేపీ వందల కోట్లు ఖర్చు చేసిందని ఆరోపించడానికి ఆధారాలు ఉంటే వాటిని ఎందుకు బయటపెట్టలేదని, కోర్టుకు వెళ్లి ఎందుకు పోరాడలేదని రాహుల్ గాంధీని ప్రశ్నించారు.భారత్ సమ్మిట్లో కౌలు రైతుల కోసం స్టాల్ ఏర్పాటు చేయడం పెద్ద జోక్ అని విమర్శించారు. తెలంగాణలో కౌలు రైతులకు ఇచ్చిన హామీలను మూడేళ్లుగా ఎందుకు అమలు చేయలేకపోయారని కాంగ్రెస్ ప్రభుత్వాన్ని నిలదీశారు. రైతుల సమస్యలపై మాట్లాడే ముందు వారికి ఇచ్చిన హామీలను నెరవేర్చాలని బండి సంజయ్ డిమాండ్ చేశారు.
