స్థానిక ఎన్నికలను తేలిగ్గా తీసుకోవద్దు.. మరో 30 ఏళ్ల నాయకత్వాన్ని తయారు చేయాలి: చంద్రబాబు
మున్సిపల్ ఎన్నికల్లో ఎన్డీఏకు చారిత్రక విజయం
గ్రామస్థాయిలోనూ కూటమి అభ్యర్థుల గెలుపే లక్ష్యంగా పనిచేయాలి
(అమరావతి, న్యూస్ఇన్)
స్థానిక ఎన్నికలను నాయకులు తేలిగ్గా తీసుకోవద్దని, గ్రామస్థాయిలోనూ ఎన్డీఏ కూటమి బలపరిచిన అభ్యర్థులే గెలిచేలా పనిచేయాలని ఆంధ్రప్రదేశ్ ముఖ్యమంత్రి చంద్రబాబు నాయుడు సూచించారు. రాబోయే 30 ఏళ్లకు ఉపయోగపడేలా కొత్త నాయకత్వాన్ని తయారు చేసుకోవాలని పిలుపునిచ్చారు. టీడీపీ ముఖ్య నేతలతో నిర్వహించిన టెలీకాన్ఫరెన్స్లో ఆయన పట్టణ, పరిషత్ ఎన్నికల ఫలితాలు, భవిష్యత్తు కార్యాచరణపై మాట్లాడారు.
ఎన్డీఏకు ప్రజల మద్దతు పెరిగింది
పట్టణ, పరిషత్ ఎన్నికల్లో ప్రజలు ఎన్డీఏకు చారిత్రక విజయాన్ని అందించారని చంద్రబాబు అన్నారు. 94 మున్సిపాలిటీల్లో 3,235 వార్డుల్లో కూటమి అభ్యర్థులు గెలిచారని తెలిపారు. 575 జడ్పీటీసీలు, 7,500కు పైగా ఎంపీటీసీ స్థానాల్లో కూటమి బలపరిచిన అభ్యర్థులు విజయం సాధించారని చెప్పారు. ఈవీఎంలు, బ్యాలెట్, పోస్టల్ ఓటింగ్.. ఏ విధానంలో ఎన్నికలు జరిగినా కూటమిదే పైచేయిగా నిలిచిందన్నారు.

గతంతో పోలిస్తే కూటమి ఓటు బ్యాంకు 25 శాతం పెరిగిందని, సుమారు ఏడు జిల్లాల్లో క్లీన్ స్వీప్ చేశామని వెల్లడించారు. అనకాపల్లి, మార్కాపురం జిల్లాల ప్రజలు 100 శాతం స్ట్రైక్ రేట్ ఇచ్చారని చెప్పారు. పోలవరం ఎడమ కాల్వ ద్వారా అనకాపల్లికి నీరు అందడం, మార్కాపురం జిల్లా ఏర్పాటు, వెలిగొండ ప్రాజెక్టు మొదటి దశ ఫలితాలు ఎన్నికల్లో ప్రభావం చూపాయని వివరించారు. వైసీపీ చేసిన తప్పుడు ప్రచారాన్ని ప్రజలు నమ్మలేదని వ్యాఖ్యానించారు.
మరో 23 పట్టణాల్లోనూ విజయం సాధించాలి
మరో 23 పట్టణాల్లో జరిగే ఎన్నికల్లోనూ కూటమి అభ్యర్థులు గెలిచేలా నేతలు కృషి చేయాలని చంద్రబాబు సూచించారు. గ్రామాల్లోనూ కూటమి బలపరిచిన అభ్యర్థులే విజయం సాధించాలని అన్నారు. స్థానిక ఎన్నికల్లో యువతకు, చదువుకున్న వారికి అవకాశం కల్పించామని, ప్రజల మనోభావాలకు అనుగుణంగా పనిచేస్తే వారి మద్దతు ఎప్పుడూ ఉంటుందని చెప్పారు.
గొడవలకు దూరంగా ఉండాలి
నాయకులు ఎట్టి పరిస్థితుల్లోనూ చెడ్డ పేరు తెచ్చుకోవద్దని, గొడవలకు వెళ్లకూడదని చంద్రబాబు హెచ్చరించారు. కొందరు హింసను నమ్ముకుంటే, కూటమి ప్రజాస్వామ్యాన్ని నమ్ముకుందని అన్నారు. అధికారాన్ని ప్రజలకు మంచి చేయడానికి, వారికి మరింత దగ్గరవడానికి ఉపయోగించుకోవాలని సూచించారు.
గెలిచిన ఎంపీటీసీ, జడ్పీటీసీ సభ్యులు చురుగ్గా పనిచేస్తూ ప్రభుత్వ కార్యక్రమాలను ప్రజల్లోకి తీసుకెళ్లాలని చెప్పారు. కేంద్రం, రాష్ట్రం, మున్సిపాలిటీలు, జిల్లా పరిషత్లలో ఎన్డీఏ అధికారంలో ఉందని, పంచాయతీల్లోనూ కూటమి అభ్యర్థులు గెలిస్తే అభివృద్ధి పనులు మరింత వేగంగా సాగుతాయని చంద్రబాబు పేర్కొన్నారు.
