అండర్-19 ఆసియా కప్ లో భారత్ దే ఆధిపత్యం
-13 ఎడిషన్లు.. 9 టైటిళ్లు భారత్వే !
(స్పోర్ట్స్ బ్యూరో, న్యూస్ఇన్)
అండర్-19 ఆసియా కప్ లో భారత్ ఆధిపత్యం కొనసాగుతోంది. టౌర్నీ ప్రారంభమైన నాటి నుంచి ఇప్పటి వరకు 9 సార్లు భారత్ విజేతగా నిలిచింది. 13 ఎడిషన్లు కప్ నిర్వహణ ఈ ఏడాదితో పూర్తయింది. ఈ టౌర్నీ చరిత్రను పరిశీలిస్తే భారత్ ఆధిపత్యం స్పష్టంగా కనిపిస్తుంది. గత మూడు ఎడిషన్లలో బంగ్లాదేశ్, పాకిస్థాన్ టైటిళ్లు గెలవడంతో ఆసియా కప్ మరింత ఆసక్తికరంగా మారింది. 2026లో భారత్ మళ్లీ కప్ గెలవడం ద్వారా తన పట్టును మరోసారి ఆసియా కప్ లో భారత జట్టు నిలుపుకుంది.
1989లో మొదలై.. ఎన్నో మలుపులు తిరిగిన టోర్నీ
ఆసియా క్రికెట్ కౌన్సిల్ (ఏసీసీ) ఆధ్వర్యంలో అండర్-19 పురుషుల ఆసియా కప్ మొదటిసారిగా 1989లో బంగ్లాదేశ్ లో ప్రారంభం అయింది. భారత్, శ్రీలంక, పాకిస్థాన్ జట్లు పాల్గొన్న ఈ పోటీలో భారత్ ఫైనల్లో శ్రీలంకను 79 పరుగుల తేడాతో ఓడించి తొలి టైటిల్ను అందుకుంది. రంజీబ్ బిస్వాల్ నాయకత్వలో సాధించిన ఈ తొలి కప్ లో సౌరవ్ గంగూలీ, వినోద్ కాంబ్లీ, అజయ్ జడేజా వంటి ఆటగాళ్లు కూడా ఆ జట్టులో ఉన్నారు. ఆ తరువాత వివిధ కారణాలతో టౌర్నికి బ్రేకులు పడ్డాయి. రెండోసారి నిర్వహించడానికి 14 ఏళ్లు పట్టింది. 2003లో పాకిస్థాన్లో జరిగిన రెండో ఎడిషన్ ఫైనల్లో భారత్ శ్రీలంకపై ఎనిమిది వికెట్ల తేడాతో విజయం సాధించింది. ఆ తర్వాత 2012లో మలేషియాలో మూడో ఎడిషన్ జరిగింది. ఈసారి భారత్, పాకిస్థాన్ ఫైనల్లో తలపడ్డాయి. మ్యాచ్ టై కావడంతో రెండు జట్లను సంయుక్త విజేతలుగా ప్రకటించారు. అండర్-19 ఆసియా కప్ చరిత్రలో ఇదొక్కటే ఉమ్మడి టైటిల్.

ఏ జట్టు ఎన్ని సార్లు విజేతగా నిలిచింది?
2013-14 నుంచి టోర్నీ దాదాపు ప్రతి ఏడాది లేదా రెండేళ్లకోసారి జరుగుతూ వచ్చింది. ఈ క్రమంలో భారత్ తన ఆధిపత్యాన్ని కొనసాగించింది. 2013-14లో పాకిస్థాన్ను 40 పరుగులతో ఓడించి కప్ గెలిచింది. 2016లో శ్రీలంకను 34 పరుగులతో, 2018లో అదే జట్టును 144 పరుగులతో ఓడించింది. 2019లో బంగ్లాదేశ్పై ఐదు పరుగుల స్వల్ప తేడాతో గెలిచింది. 2021లో శ్రీలంకను తొమ్మిది వికెట్ల తేడాతో ఓడించి మరోసారి విజేతగా నిలిచింది. 2023 నుంచి పరిస్థితి మారింది. వరుసగా రెండు ఎడిషన్లలో బంగ్లాదేశ్ విజేతగా నిలిచింది. 2023లో యూఏఈని 195 పరుగుల తేడాతో ఓడించిన బంగ్లాదేశ్, 2024లో ఫైనల్లో భారత్పై 59 పరుగుల తేడాతో గెలిచింది. 2025లో పాకిస్థాన్ ఫైనల్లో భారత్ను 191 పరుగుల తేడాతో ఓడించి రెండోసారి టైటిల్ అందుకుంది. 2012లో భారత్తో కలిసి సంయుక్త విజేతగా నిలిచిన పాకిస్థాన్కు, 2025లో దక్కిన విజయం తొలి పూర్తిస్థాయి టైటిల్. 2026లో భారత్ మళ్లీ విజేతగా నిలవడంతో టైటిళ్ల లెక్కలో మరో మార్పు వచ్చింది. ఇప్పటివరకు జరిగిన 13 ఎడిషన్లలో జట్ల విజయాల వివరాలు ఇలా ఉన్నాయి.
జట్టు టైటిళ్లు విజేతగా నిలిచిన సంవత్సరాలు
భారత్ 9 1989, 2003, 2012*, 2013-14, 2016, 2018, 2019, 2021, 2026
పాకిస్థాన్ 2 2012*, 2025
బంగ్లాదేశ్ 2 2023, 2024
ఆఫ్ఘనిస్థాన్ 1 2017

ఫైనల్ చరిత్రలో భారత్-పాకిస్థాన్ పోరు
అండర్-19 ఆసియా కప్ ఫైనల్లో భారత్, పాకిస్థాన్ తలపడటం ఇది మూడోసారి. 2012లో జరిగిన తొలి పోరు టైగా ముగిసి రెండు జట్లు సంయుక్త విజేతలయ్యాయి. 2013-14లో రెండోసారి ఎదురుపడినప్పుడు భారత్ పాకిస్థాన్ను ఓడించింది. 2025లో మూడోసారి తలపడగా పాకిస్థాన్ భారీ విజయాన్ని అందుకుంది. 2026 ఫైనల్తో ఈ రెండు జట్ల మధ్య పోరు మరోసారి ఆసక్తికర మలుపు తిరిగింది.
2026 ఫైనల్: చివరి బంతి వరకు ఉత్కంఠ
ఒమన్లోని అల్ అమరాత్ క్రికెట్ మైదానం ఈ ఏడాది టోర్నీకి వేదికైంది. నవంబర్ 5 నుంచి 14 వరకు జరిగిన 13వ ఎడిషన్లో ఎనిమిది జట్లు పాల్గొన్నాయి. భారత్, పాకిస్థాన్, బంగ్లాదేశ్, శ్రీలంక, ఆఫ్ఘనిస్థాన్తో పాటు యూఏఈ, నేపాల్, మలేషియా జట్లు బరిలోకి దిగాయి. రెండు గ్రూపులుగా జట్లను విభజించి, ప్రతి గ్రూపులో తొలి రెండు స్థానాల్లో నిలిచిన జట్లకు సెమీఫైనల్ అవకాశం కల్పించారు.
ఫైనల్లో టాస్ గెలిచిన పాకిస్థాన్ మొదట బ్యాటింగ్ ఎంచుకుంది. ఆ జట్టు నిర్ణీత 50 ఓవర్లలో తొమ్మిది వికెట్ల నష్టానికి 337 పరుగులు చేసింది. ఉస్మాన్ ఖాన్ 111 బంతుల్లో 107 పరుగులు చేసి జట్టుకు భారీ స్కోరు అందించాడు. అబ్దుల్ ఖాదిర్ 54 బంతుల్లో 80 పరుగులతో వేగంగా ఆడగా, కెప్టెన్ ఫర్హాన్ యూసఫ్ 60 బంతుల్లో 63 పరుగులు చేశాడు. భారత్ బౌలర్లలో కావ్య పటేల్ నాలుగు వికెట్లు, చిగురుపాటి వెంకట మూడు వికెట్లు తీశారు.
338 పరుగుల లక్ష్యంతో బరిలోకి దిగిన భారత్కు ఓపెనర్లు మంచి ఆరంభం ఇచ్చారు. ఆర్యవీర్ సెహ్వాగ్ 61 బంతుల్లో 58 పరుగులు చేశాడు. కెప్టెన్ లక్ష్య రాజేష్ రైచందాని 101 బంతుల్లో 80 పరుగులతో ఇన్నింగ్స్ను నిలబెట్టాడు. అయితే మధ్యలో వరుసగా వికెట్లు పడటంతో భారత్ ఒత్తిడిలో పడింది. అన్వయ్ ద్రవిడ్ 19 పరుగులు చేయగా, మనల్ చౌహాన్ 32 బంతుల్లో 47 పరుగులతో కీలక పాత్ర పోషించాడు.

ఒక దశలో భారత్ 252 పరుగులకే ఎనిమిది వికెట్లు కోల్పోయింది. విజయానికి ఇంకా పరుగులు అవసరం ఉండగా, చేతిలో రెండు వికెట్లు మాత్రమే మిగిలాయి. ఈ పరిస్థితిలో మనల్ చౌహాన్, మోహిత్ ఉల్వా కలిసి మ్యాచ్ దిశను మార్చారు. తొమ్మిదో వికెట్కు వీరిద్దరూ 57 పరుగులు జోడించి భారత్ను విజయానికి చేరువ చేశారు. మనల్ ఔటైన తర్వాత కూడా మోహిత్ వెనక్కి తగ్గలేదు. 26 బంతుల్లో ఐదు ఫోర్లు, మూడు సిక్సర్లతో అజేయంగా 49 పరుగులు చేశాడు. చివరి బంతికి మూడు పరుగులు అవసరమైన సమయంలో బౌండరీ కొట్టి భారత్కు విజయాన్ని అందించాడు. చిగురుపాటి వెంకట 8 బంతుల్లో 11 పరుగులతో నాటౌట్గా నిలిచాడు.
భారత్ 50 ఓవర్లలో తొమ్మిది వికెట్లకు 339 పరుగులు చేసి ఒక్క వికెట్ తేడాతో గెలిచింది. చివరి బంతి వరకు సాగిన ఈ పోరులో మోహిత్ ఉల్వా ఆటే కీలకంగా మారింది. అతడికి ఫైనల్ మ్యాచ్ ప్లేయర్ ఆఫ్ ద మ్యాచ్ అవార్డు దక్కింది.
వ్యక్తిగత ప్రదర్శనల్లోనూ భారత ఆటగాళ్లదే పైచేయి
2026 టోర్నీలో ఆర్యవీర్ సెహ్వాగ్ అత్యధిక పరుగులు చేసిన ఆటగాడిగా నిలిచాడు. ఐదు ఇన్నింగ్స్లలో 361 పరుగులు సాధించి ప్లేయర్ ఆఫ్ ద టోర్నమెంట్ అవార్డు అందుకున్నాడు. అతడి అత్యధిక స్కోరు 160 పరుగులు. బౌలింగ్లో ఆఫ్ఘనిస్థాన్కు చెందిన నూర్ అలీ నియాజై 14 వికెట్లతో అగ్రస్థానంలో నిలిచాడు. ఫైనల్లో పాకిస్థాన్ తరఫున ఉస్మాన్ ఖాన్ చేసిన 107 పరుగులు, భారత్ తరఫున కావ్య పటేల్ తీసిన నాలుగు వికెట్లు కూడా ఈ టోర్నీలో గుర్తుండిపోయే ప్రదర్శనలుగా నిలిచాయి.

భారత్ ఆధిపత్యానికి మరో నిదర్శనం
అండర్-19 ఆసియా కప్ కేవలం వయసు పరిమితి ఉన్న ఆటగాళ్ల టోర్నీ మాత్రమే కాదు. అంతర్జాతీయ క్రికెట్లోకి అడుగుపెట్టబోయే యువ ఆటగాళ్లకు ఇది కీలక వేదిక. ఈ పోటీల్లో రాణించిన ఆటగాళ్లకు భవిష్యత్తులో సీనియర్ జట్టులో చోటు సంపాదించే అవకాశం ఉంటుంది. అందుకే ప్రతి జట్టు ఈ టోర్నీని ప్రతిష్ఠాత్మకంగా తీసుకుంటుంది.
13 ఎడిషన్లలో తొమ్మిది టైటిళ్లు సాధించడం భారత యువ క్రికెట్ వ్యవస్థ బలాన్ని తెలియజేస్తోంది. అయితే 2023, 2024లో బంగ్లాదేశ్ విజయాలు, 2025లో పాకిస్థాన్ గెలుపు ఈ పోటీలో ఇతర జట్లు కూడా బలంగా ఎదుగుతున్నాయని చూపించాయి. 2026లో భారత్ సాధించిన విజయం ఆ పోటీ మధ్య తన ఆధిపత్యాన్ని తిరిగి చాటింది. ముఖ్యంగా ఫైనల్లో ఒత్తిడిని తట్టుకుని చివరి బంతికి గెలవడం జట్టులోని ఆటగాళ్ల పోరాట పటిమకు నిదర్శనం.
