మేం అధికారంలోకి వస్తే ఫ్యూచర్ సిటీ రద్దు …!

(హైదరాబాద్, న్యూస్ఇన్)

ముఖ్యమంత్రి రేవంత్ రెడ్డి ఎంతో ప్రతిష్టాత్మకంగా నిర్మాణం చేపడుతున్న ఫీచర్ సిటీని మేము అధికారంలోకి వచ్చిన వెంటనే రద్దు చేస్తామని మాజీ మంత్రి హరీష్ రావు మరోసారి స్పష్టం చేశారు. ముఖ్యమంత్రి రేవంత్ రెడ్డి కే ఫ్యూచర్ లేదని… ఫ్యూచర్ సిటీ పేరుతో మభ్య పెట్టడం తప్ప అక్కడ చేస్తుంది ఏమీ లేదని హరీష్ రావు ఆరోపించారు. బీఆర్ఎస్ ప్రభుత్వం హయాంలో ఫార్మాసిటీ కోసం భూములను సేకరిస్తే… కాంగ్రెస్ ప్రభుత్వం ఫ్యూచర్ సిటీ పేరుతో పక్కదారి పట్టిస్తోందన్నారు. చట్ట ప్రకారం ఇది సాధ్యం కాదని హరీష్ రావు అన్నారు. భూసేకరణ ఏ ప్రాజెక్టు కోసం చేపడితే ఆ ప్రాజెక్టు నే అక్కడ పూర్తి చేయాలని పార్లమెంట్లో చట్టం చేసిన విషయాన్ని హరీష్ రావు గుర్తు చేశారు. ఫ్యూచర్ సిటీ అని గొప్పలు చెబుతున్న ఆ ప్రాజెక్టు.. ఇప్పుడు అక్కడి చుట్టుపక్కల గ్రామాలకు ఓ శాపం కాబోతోంది.

సీఎం నిగ్గు తేల్చాలి….

మీనాక్షి నటరాజన్ రాజ్యసభ సభ్యత్వం నామినేషన్ తిరస్కరణ వెనుక రాష్ట్ర కాంగ్రెస్ నేతలే ఉన్నారని మధ్యప్రదేశ్ బిజెపి నేతలు చెబుతున్న విషయాన్ని హరీష్ ప్రస్తావించారు.సీఎం రేవంత్ రెడ్డి ప్రధాన అనుచరుడికి పిసిసి వర్కింగ్ ప్రెసిడెంట్ పోస్ట్ కట్టబెట్టేందుకు మీనాక్షి నటరాజ అంగీకరించక పోవడంతోనే ఆ నేత మధ్యప్రదేశ్ బిజెపి నేతలకు సమాచారం ఇచ్చారని తమకు తెలుస్తోందన్నారు. ముఖ్యమంత్రి రేవంత్ రెడ్డి దీనిపై స్పష్టత ఇవ్వాల్సిన అవసరం ఉందన్నారు.ఈ నామినేషన్ తిరస్కరణ కుట్రపై రేవంత్ రెడ్డి సిట్ విచారణ వేస్తాడా.లేక ఇంకేదైనా విచారణ వేస్తాడా. ఏదో ఒకటి చేసి అసలు ఏం జరిగిందో నిగ్గు తేల్చాలి..

విద్యా శాఖలో కుంభకోణం….

విద్యాశాఖలో గుజరాత్ కాంట్రాక్టర్ల పేరుతో రూ. 2 వేల కోట్ల భారీ కుంభకోణం జరిగిందని ఆరోపించారు. ఇందుకోసమే పాఠశాలల ప్రారంభాన్ని వాయిదా వేశారన్నారు.ఏటా జూన్ 12న తెరుచుకోవాల్సిన స్కూళ్లను 15వ తేదీకి ఎందుకు వాయిదా వేశారు. దీని వెనుక ఏకంగా రూ. 2 వేల కోట్ల భారీ కుంభకోణం దాగి ఉందన్నారు.కమీషన్ల కోసం కాంట్రాక్టులు సెట్ కాకపోవడం వల్లే బడుల ప్రారంభాన్ని వాయిదా వేశారు.
అప్పులు తేవడానికి దళారులను పెట్టుకున్న ప్రభుత్వం.. రాష్ట్రం ఇచ్చిన వందల కోట్ల కమీషన్లతో ముంబాయి బ్రోకర్ విమానం కొనుక్కున్నారన్నారు.
రైతులకు, విద్యార్థులకు నిధులు లేవంటున్న ప్రభుత్వానికి.. సీఎం వంద కోట్ల గెస్ట్ హౌస్‌కు, నెలకు 5 కోట్ల హెలికాప్టర్ షికార్లకు డబ్బులెక్కడివని ప్రశ్నించారు.