క్రైం - లీగ‌ల్తాజా వార్త‌లుబిజినెస్సిటీ న్యూస్

హైదరాబాద్‌లో పెళ్లి పేరుతో మహిళా వ్యాపారవేత్తపై లైంగిక దాడి.. రూ.5.09 కోట్ల మోసం..!

-ముంబై మహిళను నమ్మించి కోట్ల విలువైన డ్రైఫ్రూట్స్, మసాలా సరుకులు స్వాహా
-ప్రేమ, పెళ్లి పేరుతో హైదరాబాద్‌కు రప్పించి వేధింపులు

(హైదరాబాద్,న్యూస్ఇన్‌)

వ్యాపార పరిచయాన్ని ఆసరాగా చేసుకుని ఓ మహిళా వ్యాపారవేత్తను నమ్మించి కోట్ల రూపాయల విలువైన సరుకును కాజేయడమే కాకుండా, పెళ్లి చేసుకుంటానని న‌మ్మించి మ‌హిళ‌పై లైంగిక దాడికి పాల్పడినట్లు హైదరాబాద్‌లో సంచలన ఆరోపణలు వెలుగులోకి వచ్చాయి. ముంబైకి చెందిన మహిళా వ్యాపారవేత్త ఇచ్చిన ఫిర్యాదు మేరకు హైదరాబాద్‌కు చెందిన వ్యాపారి మనీశ్ భాటితో పాటు మరో ఐదుగురిపై పంజాగుట్ట పోలీసులు కేసు నమోదు చేసి దర్యాప్తు చేపట్టారు. వ్యాపార లావాదేవీల పేరుతో ప్రారంభమైన పరిచయం చివరకు రూ.5.09 కోట్ల మోసం, లైంగిక వేధింపులు, బ్లాక్‌మెయిల్ ఆరోపణల వరకు వెళ్లడం కలకలం రేపుతోంది.

DRY FRUITS BUSINESS

బాధితురాలు పోలీసులకు ఇచ్చిన ఫిర్యాదు ప్రకారం.. 2024 జులైలో పిస్తా, లవంగాల వ్యాపార లావాదేవీల సందర్భంగా మనీశ్ భాటితో ఆమెకు పరిచయం ఏర్పడింది. హైదరాబాద్ కిరాణా మర్చంట్స్ అసోసియేషన్ జాయింట్ సెక్రటరీగా ఉన్న మనీశ్ తొలినాళ్లలో వ్యాపార లావాదేవీలకు సంబంధించిన చెల్లింపులను సకాలంలో జరుపుతూ ఆమె నమ్మకాన్ని సంపాదించినట్లు బాధితురాలు పేర్కొన్నారు. ఆ తర్వాత పెద్ద మొత్తంలో సరుకులు తీసుకుని డబ్బులు చెల్లించకుండా మోసానికి పాల్పడినట్లు ఆరోపించారు.

ఈ వ్యవహారంలో మనీశ్ భాటితో పాటు అతని సోదరుడు పవన్ భాటి, ఇర్ఫాన్ భాడా, నదీమ్ జుమానీ, జీషాన్ అహ్మద్, మహ్మద్ రషీద్‌ల పాత్ర ఉందని ఫిర్యాదులో పేర్కొన్నారు. మొత్తం రూ.5.09 కోట్ల మేర వ్యాపార బకాయిలు చెల్లించకుండా మోసం చేసినట్లు బాధితురాలు ఆరోపించారు. ఇందులో మనీశ్ భాటి రూ.1.67 కోట్లు, ఇర్ఫాన్ భాడా రూ.1.97 కోట్లు, నదీమ్ జుమానీ రూ.1.17 కోట్లు, జీషాన్ అహ్మద్ రూ.25.79 లక్షలు, పవన్ భాటి రూ.6.25 లక్షల మేర బకాయిలు ఎగ్గొట్టినట్లు పేర్కొన్నారు.

పెళ్లి పేరుతో మ‌భ్య‌పెట్టిన వ్యాపారి….

MUMBAI LADY CHEATED

మరోవైపు బకాయిలు చెల్లించాలని అడిగిన ప్రతిసారీ మనీశ్ భాటి ప్రేమ, పెళ్లి పేరుతో తనను నమ్మించేందుకు ప్రయత్నించాడని బాధితురాలు ఆరోపించారు. ఈ క్రమంలో పలుమార్లు హైదరాబాద్‌కు రప్పించి, నగరంలోని వేర్వేరు హోటళ్లలో తనపై బలవంతంగా మద్యం తాగించి లైంగిక దాడికి పాల్పడినట్లు ఫిర్యాదులో వెల్లడించారు. వీడియో కాల్స్ సమయంలో తనకు తెలియకుండా ప్రైవేట్ వీడియోలు రికార్డు చేసి వాటిని అడ్డుపెట్టుకుని బెదిరింపులకు దిగినట్లు పేర్కొన్నారు.వ్యాపార బకాయిలు అడిగినా, తన డబ్బులు తిరిగి ఇవ్వాలని కోరినా ప్రైవేట్ ఫొటోలను వ్యాపారులందరికీ పంపిస్తానని బెదిరించినట్లు బాధితురాలు పోలీసులకు తెలిపారు. దీంతో తీవ్ర మానసిక ఒత్తిడికి గురైనట్లు ఫిర్యాదులో వివరించారు.

ముంబాయిలో ఫిర్యాదు…హైద‌రాబాద్ కు బ‌దిలీ…..

ఈ ఘటనపై ముంబైలోని మహిమ్ పోలీస్ స్టేషన్‌లో జీరో ఎఫ్‌ఐఆర్ నమోదు కాగా, ఈ నెల 13న కేసును హైదరాబాద్‌లోని పంజాగుట్ట పోలీస్ స్టేషన్‌కు బదిలీ చేశారు. బాధితురాలి ఫిర్యాదు ఆధారంగా కేసు నమోదు చేసిన పంజాగుట్ట పోలీసులు దర్యాప్తు మొద‌లుపెట్టారు. వ్యాపార లావాదేవీలకు సంబంధించిన పత్రాలు, చెల్లింపుల వివరాలు, ఇతర ఆధారాలను పరిశీలిస్తున్నట్లు సమాచారం.

Leave a Reply

Your email address will not be published. Required fields are marked *