ఆంధ్ర ప్ర‌దేశ్‌తాజా వార్త‌లు

మురసు తుఫాన్‌తో ఏపీకి రూ.2,484 కోట్ల నష్టం.. తక్షణ సాయం అందించండి

– కేంద్ర బృందానికి సీఎం చంద్రబాబు విజ్ఞప్తి
-1.43 లక్షల హెక్టార్లలో దెబ్బతిన్న పంటలు
-1,385 కిలోమీటర్ల మేర రహదారులు ధ్వంసం
-తీర ప్రాంత మౌలిక వసతుల బలోపేతానికి సహకరించాలని వినతి

(అమరావతి, న్యూస్ ఇన్)

వరుస తుఫాన్లతో ఆంధ్రప్రదేశ్‌లో తీవ్ర నష్టం వాటిల్లిందని, బాధితులను ఆదుకునేందుకు కేంద్ర ప్రభుత్వం తక్షణ ఆర్థిక సాయం అందించాలని ముఖ్యమంత్రి చంద్రబాబు నాయుడు కోరారు. మురసు తుఫాన్ ప్రభావంతో రాష్ట్రంలో వ్యవసాయం, రహదారులు, విద్యుత్, సాగునీటి వ్యవస్థలు సహా పలు రంగాలకు భారీ నష్టం సంభవించిందని వివరించారు. తుఫాన్లను తట్టుకునేలా కోస్తాంధ్రలో మౌలిక వసతులను బలోపేతం చేసేందుకు కేంద్రం ప్రత్యేకంగా సహకరించాలని విజ్ఞప్తి చేశారు.

మురసు తుఫాన్ నష్టాన్ని అంచనా వేసేందుకు రాష్ట్రంలో పర్యటించిన కేంద్ర బృందం ఆదివారం ముఖ్యమంత్రి చంద్రబాబుతో వర్చువల్‌గా సమావేశమైంది. కేంద్ర హోంశాఖ సంయుక్త కార్యదర్శి చిత్తరంజన్ దాస్ నేతృత్వంలోని ఏడుగురు సభ్యుల బృందం క్షేత్రస్థాయిలో తాము పరిశీలించిన పరిస్థితులను సీఎంకు వివరించింది. ఎల్‌నినో ప్రభావంతో పాటు వరుస తుఫాన్లు రాష్ట్రాన్ని అతలాకుతలం చేశాయని, రైతులు సహా వివిధ వర్గాలు తీవ్రంగా నష్టపోయాయని ముఖ్యమంత్రి తెలిపారు. క్షేత్రస్థాయిలో పరిశీలించిన నష్టాన్ని కేంద్రానికి సమర్పించే నివేదికలో పూర్తిస్థాయిలో పొందుపరచాలని, నివేదికను వీలైనంత త్వరగా అందించాలని కోరారు.

AP CYCLONES

రూ.2,484 కోట్ల మేర నష్టం

రాష్ట్ర ప్రభుత్వం రూపొందించిన ప్రాథమిక అంచనాల ప్రకారం మురసు తుఫాన్ కారణంగా మొత్తం రూ.2,484 కోట్ల మేర నష్టం వాటిల్లింది. ఇందులో వ్యవసాయ రంగానికి రూ.875 కోట్లు, ఉద్యాన పంటలకు రూ.337 కోట్లు, రహదారులకు రూ.888 కోట్ల నష్టం సంభవించింది. వ్యవసాయ పంటలు 1,43,617 హెక్టార్లలో దెబ్బతినగా, 1,86,063 మంది రైతులు ప్రభావితమయ్యారు. ఉద్యాన పంటలు 6,756 హెక్టార్లలో దెబ్బతినడంతో 12,605 మంది రైతులు నష్టపోయారు.తుఫాన్ ప్రభావంతో 1,385 కిలోమీటర్ల మేర రహదారులు దెబ్బతిన్నాయి. గ్రామీణ ప్రాంతాల్లో 114 రహదారులకు సంబంధించి 220 కిలోమీటర్ల మేర నష్టం వాటిల్లింది. సాగునీటి రంగంలో 369 వనరులు దెబ్బతినగా, 509 చోట్ల గండ్లు పడ్డాయి. విద్యుత్ వ్యవస్థలో 10,192 పదకొండు కేవీ స్తంభాలు, 6,442 ఎల్టీ స్తంభాలు, 1,448 డిస్ట్రిబ్యూషన్ ట్రాన్స్‌ఫార్మర్లు దెబ్బతిన్నాయి. మొత్తం 3,859 ఇళ్లు దెబ్బతినగా, అత్యవసర సహాయక చర్యల కోసం ప్రభుత్వం రూ.37 కోట్లు ఖర్చు చేసింది.

పంట నష్టం తీవ్రంగా ఉందన్న కేంద్ర బృందం

కేంద్ర బృందం క్షేత్రస్థాయి పరిశీలనలో గ్రామీణ ప్రాంతాల్లో ఫ్లాష్ ఫ్లడ్స్ కారణంగా రహదారులు, విద్యుత్ స్తంభాలకు భారీ నష్టం జరిగినట్లు గుర్తించింది. ముందస్తుగా కాలువలు, వాగుల్లో పూడికతీత పనులు చేపట్టడం వల్ల నష్టం కొంతవరకు తగ్గిందని అభిప్రాయపడింది. తూర్పుగోదావరి జిల్లాలో వరి పంటకు 80 శాతం, ఏలూరు జిల్లాలో 90 శాతం వరకు నష్టం జరిగినట్లు వివరించింది. మామిడి, బొప్పాయి వంటి ఉద్యాన పంటలు కూడా తీవ్రంగా దెబ్బతిన్నాయని తెలిపింది.పత్తి వంటి వాణిజ్య పంటలకు బీమా ప్రీమియం అధికంగా ఉండటంతో చాలామంది రైతులు బీమా చేయించుకోలేదని బృందం గుర్తించింది. దెబ్బతిన్న కచ్చా ఇళ్లలో నివసిస్తున్న కుటుంబాలకు 30 రోజుల్లో మూడుసార్లు రేషన్ అందించే అంశాన్ని పరిశీలించాలని సూచించింది. గిరిజన బాధితులను ప్రత్యేకంగా ఆదుకోవడంతో పాటు ప్రకృతి వ్యవసాయం, సేంద్రియ పద్ధతుల్లో సాగు చేస్తూ నష్టపోయిన రైతులకు అధిక పరిహారం అందించే అంశాన్ని కూడా పరిశీలించాలని పేర్కొంది.

60 ప్రాంతాల్లో కేంద్ర బృందం పరిశీలన

AP CYCLONE EFFECT

చిత్తరంజన్ దాస్ నేతృత్వంలోని ఏడుగురు సభ్యుల బృందం రెండు బృందాలుగా విడిపోయి బాపట్ల, పల్నాడు, ఏలూరు, తూర్పుగోదావరి జిల్లాల్లో పర్యటించింది. సుమారు 60 ప్రాంతాల్లో పంట పొలాలు, రహదారులు, కాలువలు, ఇళ్లు, ఇతర మౌలిక వసతులకు జరిగిన నష్టాన్ని పరిశీలించింది. భీమడోలు మండలం సూరప్పగూడెంలో రైతులతో మాట్లాడి పంట నష్టాన్ని తెలుసుకుంది. రావులపర్రులో డ్రైనేజీ వ్యవస్థ, వరి పంటలను, కునకలమర్రులో కొమ్ము కాలువను పరిశీలించింది. చీరాలలో మత్స్యకారుల పడవలకు జరిగిన నష్టాన్ని, బొప్పూడిలో ఇళ్లు, ఉద్యాన పంటలు, వ్యవసాయం, బాతుల పెంపకంపై తుఫాన్ ప్రభావాన్ని అంచనా వేసింది.

వ్యవసాయంతో పాటు వైద్య, ఆరోగ్య, మత్స్య, పురపాలక, గ్రామీణాభివృద్ధి, తాగునీటి సరఫరా, విద్య, పశుసంవర్ధక, చేనేత రంగాలకు జరిగిన నష్టాన్ని కూడా రాష్ట్ర ప్రభుత్వం కేంద్ర బృందం దృష్టికి తీసుకెళ్లింది. కేంద్ర బృందం సమర్పించే నివేదిక ఆధారంగా రాష్ట్రానికి తగిన సాయం అందుతుందని ప్రభుత్వం ఆశిస్తోంది.

Leave a Reply

Your email address will not be published. Required fields are marked *