కొడంగల్‌ను కృష్ణా జలాలతో త‌డిపే బాధ్యత నాది: సీఎం రేవంత్ రెడ్డి
రూ.9 వేల కోట్లతో కొడంగల్‌లో అభివృద్ధి ప‌నులు
(న్యూస్ఇన్, పాలమూరు)
కోడంగ‌ల్ నియోజ‌క‌వ‌ర్గానికి కృష్ణా జలాలతో త‌డిపే బాధ్యత త‌న‌ద‌ని సీఎం రేవంత్ రెడ్డి అన్నారు. జిల్లాలో వలసలు నివారించి, సాగునీటి కష్టాలు తీర్చడమే తమ ప్రభుత్వ లక్ష్యమని ముఖ్యమంత్రి రేవంత్ రెడ్డి ప్రకటించారు. కృష్ణా జలాలను కొడంగల్‌కు తీసుకొచ్చి బీడు భూములను పచ్చని పంట పొలాలుగా మారుస్తానని హామీ ఇచ్చారు. ఎవరు అడ్డుపడినా వెనక్కి తగ్గేది లేదని స్పష్టం చేశారు. లగచర్లలో నిర్వహించిన బహిరంగ సభలో ఆయన ప్రసంగిస్తూ పాలమూరు అభివృద్ధి, సాగునీటి ప్రాజెక్టులు, గత ప్రభుత్వ పాలన, తమ ప్రభుత్వ ప్రాధాన్యాలను వివరించారు.
75 ఏళ్లుగా తీరని పాలమూరు ప్రజల కష్టాలు
బూర్గుల రామకృష్ణారావు నుంచి ఇప్పటివరకు ఎంతోమంది పాలమూరు జిల్లా నుంచి ప్రాతినిధ్యం వహించినా వలసలు ఆగలేదని రేవంత్ రెడ్డి అన్నారు. ప్రాజెక్టులు పూర్తికాక, పొలాలకు నీళ్లు అందక ప్రజలు ఇబ్బందులు పడ్డారని పేర్కొన్నారు. తెలంగాణ రాష్ట్రం ఏర్పడితే తమ కష్టాలు తీరుతాయని ఆశించిన పాలమూరు ప్రజలకు గత పదేళ్ల పాలనలో నిరాశే ఎదురైందన్నారు. కేసీఆర్ పాలమూరు ప్రాజెక్టులను నిర్లక్ష్యం చేశారని ఆరోపించారు.
రూ.9 వేల కోట్లతో కొడంగల్ అభివృద్ధి
మక్తల్-నారాయణపేట-కొడంగల్ ఎత్తిపోతల పథకం పనులను తమ ప్రభుత్వం ప్రారంభిస్తుంటే కేసీఆర్, కేటీఆర్ అడ్డుకుంటామని మాట్లాడుతున్నారని సీఎం విమర్శించారు. వ‌చ్చే ఏడాది డిసెంబర్ నాటికి కృష్ణా జలాలను తీసుకొచ్చి కొడంగల్ భూములను సస్యశ్యామలం చేస్తానని పోలేపల్లి ఎల్లమ్మతల్లి సాక్షిగా హామీ ఇచ్చారు.
ఏటా రూ.80 వేల కోట్ల చెల్లింపులు
గత పదేళ్లలో కేసీఆర్ ప్రభుత్వం రూ.8.11 లక్షల కోట్ల అప్పులు చేసిందని రేవంత్ రెడ్డి ఆరోపించారు. ఆ అప్పులకు సంబంధించిన చెల్లింపుల కింద ఏటా రూ.80 వేల కోట్లు ఖర్చు చేస్తున్నామని చెప్పారు. తమ ప్రభుత్వం ఉద్యోగుల సంక్షేమానికి ప్రాధాన్యం ఇస్తూ 2024 జనవరి నుంచి ప్రతి నెలా మొదటి తేదీనే 11 లక్షల మంది ప్రభుత్వ ఉద్యోగులకు జీతాలు అందిస్తోందని వివరించారు.
కేటీఆర్‌పై ఘాటు వ్యాఖ్యలు
కేటీఆర్‌పై సీఎం తీవ్ర విమర్శలు చేశారు. గడ్డం పెంచుకున్నంత మాత్రాన కేటీఆర్ రేవంత్ రెడ్డి కాలేరని, అందుకు గుండె ధైర్యం, ప్రజల కోసం నిలబడే తెగువ ఉండాలని వ్యాఖ్యానించారు. పులిని చూసి నక్క వాతలు పెట్టుకున్నంత మాత్రాన నక్క పులి కాలేదని ఎద్దేవా చేశారు. కొడంగల్ ప్రజల అండ ఉంటే ఢిల్లీలో మోదీనైనా, కేడీనైనా ఎదుర్కొంటానని అన్నారు.
కొడంగల్‌ను ఎడ్యుకేషన్ హబ్‌గా తీర్చిదిద్దుతాం
గతంలో ఉన్నత విద్య కోసం కొడంగల్ విద్యార్థులు ఇతర జిల్లాలు, రాష్ట్రాలకు వెళ్లాల్సి వచ్చేదని, ఇప్పుడు కొడంగల్‌ను ఎడ్యుకేషన్ హబ్‌గా అభివృద్ధి చేస్తున్నామని చెప్పారు. తెలంగాణను దేశంలోనే నంబర్ వన్‌గా తీర్చిదిద్దేందుకు నిరంతరం పనిచేస్తానని పేర్కొన్నారు. సంక్రాంతి తర్వాత ‘ప్రజాబలం’ పేరుతో ప్రజల్లోకి వస్తామని, ఎల్నినో ప్రభావాన్ని ఎదుర్కొనేందుకు అందరూ కలిసికట్టుగా పనిచేయాలని పిలుపునిచ్చారు. జర్నలిస్టులు అధైర్యపడవద్దని, వారి సమస్యలను పరిష్కరించే బాధ్యత తనదేనని భరోసా ఇచ్చారు.సస్యశ్యామలం చేస్తానని పోలేపల్లి ఎల్లమ్మతల్లి సాక్షిగా హామీ ఇచ్చారు. కొడంగల్‌లో రూ.9 వేల కోట్లతో అభివృద్ధి పనులకు శ్రీకారం చుట్టామని, రాబోయే రోజుల్లో మరిన్ని పెట్టుబడులు తీసుకొచ్చి ప్రాంతాన్ని అభివృద్ధి చేస్తామని తెలిపారు