నల్లగొండలో రైతాంగ మహాప్రదర్శన.. ఎర్రజెండాల రెపరెపలతో హోరెత్తిన పట్టణం
అఖిల భారత రైతు సంఘం 36వ జాతీయ మహాసభలు – భారీ ర్యాలీ
కదం తొక్కిన వేలాది మంది రైతులు
దింసా నృత్యాలు, కోలాటాలు, ఎడ్లబండ్ల ప్రదర్శన ప్రత్యేక ఆకర్షణ
(నల్లగొండ,న్యూస్ఇన్)
తెలంగాణ సాయుధ రైతాంగ పోరాట చరిత్రకు సాక్షిగా నిలిచిన నల్లగొండ మరోసారి రైతాంగ ఉద్యమ నినాదాలతో మారుమోగింది. అఖిల భారత రైతు సంఘం 36వ జాతీయ మహాసభల సందర్భంగా నల్లగొండలో నిర్వహించిన రైతాంగ మహాప్రదర్శన ఎర్రజెండాల రెపరెపలు, వేలాది మంది రైతుల నినాదాలతో ఉత్సాహభరితంగా సాగింది. రైతులు, వ్యవసాయ కార్మికులు, ప్రజాసంఘాల ప్రతినిధులు పెద్ద సంఖ్యలో పాల్గొని తమ ఐక్యతను చాటుకున్నారు.మర్రిగూడ బైపాస్ నుంచి ఎన్జీ కళాశాల వరకు సుమారు నాలుగు కిలోమీటర్ల మేర సాగిన ఈ ప్రదర్శన రెండు గంటలకు పైగా కొనసాగింది. ప్రదర్శన ఆసాంతం రైతాంగ పోరాట స్ఫూర్తి, సంప్రదాయ కళారూపాలు, గ్రామీణ సంస్కృతి ప్రతిబింబించాయి. పట్టణంలోని ప్రధాన వీధులన్నీ ఎర్రజెండాలతో నిండిపోగా, రైతుల నినాదాలు ప్రత్యేక ఆకర్షణగా నిలిచాయి.
పోరాటాల చరిత్రకు ప్రతిబింబంగా మహాప్రదర్శన

భూమి కోసం, భుక్తి కోసం సాగిన తెలంగాణ సాయుధ రైతాంగ పోరాటానికి నల్లగొండ కీలక కేంద్రంగా నిలిచింది. ఆ పోరాట వారసత్వాన్ని గుర్తుచేస్తూ నిర్వహించిన ప్రస్తుత మహాప్రదర్శనలో రైతాంగ ఐక్యత ప్రధానంగా కనిపించింది. ఒకప్పుడు భూస్వామ్య ఆధిపత్యానికి వ్యతిరేకంగా సాగిన పోరాట స్ఫూర్తిని నేటి వ్యవసాయ రంగ సమస్యలతో ముడిపెడుతూ రైతులు తమ గళాన్ని వినిపించారు.
వ్యవసాయ రంగంలో కార్పొరేట్ సంస్థల ఆధిపత్యం, ప్రభుత్వ విధానాలపై నిరసన వ్యక్తం చేస్తూ వినూత్న ప్రదర్శనలు నిర్వహించారు. అంబానీ, అదానీ, ప్రధాని మోదీ పేర్లతో ఏర్పాటు చేసిన భారీ దిష్టిబొమ్మను ప్రదర్శనలో భాగంగా దగ్ధం చేశారు. వ్యవసాయ రంగంపై కార్పొరేట్ ప్రభావం పెరుగుతోందంటూ నిర్వాహకులు తమ నిరసనను చాటారు.
దింసా నృత్యాలు.. కోలాటాలు.. ఎడ్లబండ్ల సందడి
మహాప్రదర్శనలో ఆదివాసీ సంప్రదాయ దింసా నృత్యాలు ప్రత్యేక ఆకర్షణగా నిలిచాయి. మహిళల కోలాటాలు, పురుషుల చెక్కభజనలు, చిరుత భజనలు, డప్పు చప్పుళ్లు, డీజే సప్పులతో పట్టణ వీధులు సందడిగా మారాయి. గ్రామీణ వ్యవసాయ సంస్కృతికి ప్రతీకగా నిలిచిన అలంకరించిన ఎడ్లబండ్లు ప్రదర్శనలో ప్రత్యేక శోభను తీసుకొచ్చాయి. పల్లె జీవన విధానాన్ని గుర్తుచేసిన ఈ ప్రదర్శనలను పట్టణ ప్రజలు ఆసక్తిగా తిలకించారు.

ప్రదర్శన ముందు వరుసలో రెడ్ షర్ట్ వాలంటీర్లు క్రమశిక్షణతో నిర్వహించిన కవాతు ఆకట్టుకుంది. రైతాంగ నాయకులు ముందుండి ప్రదర్శనను నడిపించారు. మార్గమధ్యంలో యూటీఎఫ్, సీఐటీయూ, ఎస్ఎఫ్ఐ, డీవైఎఫ్ఐ తదితర ప్రజాసంఘాల నాయకులు, కార్యకర్తలు ఘన స్వాగతం పలికారు. పూలవర్షం కురిపిస్తూ రైతులకు సంఘీభావం ప్రకటించారు.
నల్లగొండలో సాగిన రైతాంగ మహాప్రదర్శన అఖిల భారత రైతు సంఘం జాతీయ మహాసభలకు ప్రత్యేక ఆకర్షణగా నిలిచింది. సంప్రదాయ కళారూపాలు, రైతాంగ ఐక్యత, పోరాట నినాదాల సమాహారంగా సాగిన ఈ ప్రదర్శన జిల్లా కేంద్రంలో ప్రత్యేక సందడి నెలకొల్పింది.
