సైబర్ భద్రతపై రాజీపడొద్దు-సజ్జనార్
(న్యూస్ఇన్‌,క్రైంబ్యూరో)
వెబ్ డెవ‌ల‌ప‌ర్స్ సైబర్ భద్రతపై ఎక్క‌డా రాజీ ప‌డ‌వ‌ద్ద‌ని హైద‌రాబాద్ పోలీస్ క‌మిష‌న‌ర్ సజ్జనార్ సూచించారు.
పౌరుల ఆర్థిక లావాదేవీలు, వ్యక్తిగత సమాచారాన్ని భద్రపరిచే సంస్థలు అత్యంత అప్రమత్తంగా వ్యవహరించాలన్నారు. బ్యాంకులు, ఆర్థిక సంస్థలు, క్విక్ కామర్స్ వేదికలు, మొబిలిటీ ప్లాట్‌ఫారమ్‌లు తమ సైబర్ భద్రతా వ్యవస్థలను, నిపుణులైన సిబ్బందిని మరింత బలోపేతం చేసుకోవాలన్నారు. ఆర్టిఫిషియల్ ఇంటెలిజెన్స్ (ఏఐ) ఆధారిత దాడులు, విదేశీ హ్యాకర్ల నుంచి ఎదురవుతున్న కొత్త తరహా ముప్పులను ఎదుర్కొనేందుకు ముందస్తు కార్యాచరణ సిద్ధం చేసుకోవాలని స్పష్టం చేశారు.
నిఘా అవసరం….
నాన్ బ్యాంకింగ్ ఫైనాన్షియల్ కంపెనీలు (ఎన్‌బీఎఫ్‌సీలు) వినియోగదారుల వ్యక్తిగత సమాచారం, చెల్లింపుల నిర్వహణ కోసం థర్డ్‌పార్టీ మాడ్యూళ్లు, ఏపీఐ సేవలపై ఆధారపడుతున్నాయని సీపీ తెలిపారు. ఇలాంటి సహాయక వ్యవస్థలను కూడా ప్రధాన అప్లికేషన్లతో సమానంగా పరిగణించి అత్యున్నత భద్రతా ప్రమాణాలు అమలు చేయాలన్నారు.ఏఐ ఏజెంట్ల సహాయంతో సైబర్ నేరగాళ్లు ఆర్థిక సంస్థల నెట్‌వర్క్‌లలోని లోపాలను వేగంగా గుర్తిస్తున్నారని పేర్కొన్నారు. అప్‌డేట్ చేయని పాత సాఫ్ట్‌వేర్లు, తప్పుగా కాన్ఫిగర్ చేసిన ఇంటర్నెట్ వ్యవస్థలు, కస్టమర్ల ఫిర్యాదుల పోర్టళ్లలోని సాంకేతిక లోపాలను లక్ష్యంగా చేసుకుంటున్నారని హెచ్చరించారు.ఆటోమేటెడ్ ఫండ్ డిస్బర్స్‌మెంట్ వ్యవస్థలు, పేమెంట్ ఏపీఐల ద్వారా క్షణాల్లో కోట్లాది రూపాయలను మ్యూల్ ఖాతాలకు మళ్లించి, పోలీసులకు ఆధారాలు చిక్కకుండా డిజిటల్ రికార్డులను తొలగించేందుకు ప్రయత్నిస్తున్నారని ఆందోళన వ్యక్తం చేశారు.డిజిటల్ వ్యవస్థల్లో చిన్నపాటి భద్రతా లోపం కూడా తలెత్తకుండా సంస్థలు అత్యున్నత ప్రమాణాలు పాటించాలని, పౌరుల ఆర్థిక భద్రత దృష్ట్యా ముందస్తు నివారణ చర్యలు అత్యంత కీలకమని సీపీ పునరుద్ఘాటించారు.
అనుమానం వ‌స్తే ఫిర్యాదు చేయండి..
ఎవరైనా అనుమానాస్పద ఆర్థిక లావాదేవీలను గుర్తించినా, సైబర్ మోసానికి గురైనా ఆలస్యం చేయకుండా జాతీయ సైబర్ క్రైమ్ హెల్ప్‌లైన్ నంబర్ 1930కు ఫోన్ చేయాలని లేదా cybercrime.gov.in వెబ్‌సైట్‌లో ఫిర్యాదు చేయాలని సీపీ సజ్జనర్ కోరారు.