గిగ్ వర్కర్లకు రూ.15 లక్షల బీమా.. ప్రతి లావాదేవీపై 1% వాటా
- గిగ్ వర్కర్ల హక్కుల పరిరక్షణకు తెలంగాణలో కొత్త చట్టం
- ప్రత్యేక రెస్ట్ జోన్లు, డేటాపై కార్మికులకు పూర్తి అధికారం
(హైదరాబాద్, న్యూస్ఇన్)
తెలంగాణలో గిగ్ వర్కర్ల హక్కుల పరిరక్షణకు కాంగ్రెస్ ప్రభుత్వం కీలక చర్యలు చేపడుతోందని లోక్సభ ప్రతిపక్ష నేత రాహుల్ గాంధీ వెల్లడించారు. ప్రతి గిగ్ వర్కర్కు రూ.5 లక్షల ప్రమాద బీమా, రూ.10 లక్షల ఆరోగ్య బీమా కల్పించనున్నట్లు ప్రకటించారు.
గిగ్ వర్కర్ల సమస్యలను గతంలో స్వయంగా తెలుసుకున్నామని, వారికి రక్షణ కల్పిస్తామని ఇచ్చిన హామీని ఇప్పుడు నెరవేరుస్తున్నామని తెలిపారు. తెలంగాణ ప్రభుత్వం తీసుకురానున్న కొత్త చట్టంతో కార్మికులకు తమ పని డేటాపై పూర్తి హక్కులు లభిస్తాయని చెప్పారు. డెలివరీలు, రైడ్లు, పని సమయం, ఆదాయానికి సంబంధించిన వివరాలు మొబైల్ ఫోన్లోనే అందుబాటులో ఉంటాయని పేర్కొన్నారు.

హైదరాబాద్తో పాటు తెలంగాణలోని అన్ని నగరాల్లో వై-ఫై సదుపాయంతో ప్రత్యేక రెస్ట్ జోన్లు ఏర్పాటు చేయనున్నట్లు రాహుల్ వెల్లడించారు. అక్కడ వాహనాల పార్కింగ్తో పాటు కార్మికులు విశ్రాంతి తీసుకునేందుకు సౌకర్యాలు కల్పిస్తామని తెలిపారు.
గిగ్ వర్కర్ల భవిష్యత్తుకు సామాజిక భద్రత కల్పించేలా మరో కీలక నిర్ణయం తీసుకున్నట్లు చెప్పారు. ఉబెర్ రైడ్, బ్లింకిట్ డెలివరీ వంటి ప్రతి లావాదేవీపై ఒక శాతం మొత్తాన్ని సంబంధిత కంపెనీలు గిగ్ వర్కర్ల బోర్డుకు చెల్లించాల్సి ఉంటుందని వివరించారు. ఈ నిధులు కార్మికుల బ్యాంకు ఖాతాలకు చేరేలా వ్యవస్థ ఏర్పాటు చేస్తామని తెలిపారు. గిగ్ వర్కర్లకు పెన్షన్, ఆర్థిక భద్రత కల్పించడమే ఈ చర్యల లక్ష్యమని రాహుల్ గాంధీ పేర్కొన్నారు.
