జర్నలిస్టుల అక్రిడిటేషన్ కార్డుల రెన్యువల్‌పై హైకోర్టు కీలక ఆదేశాలు
నవంబర్ 23లోగా పూర్తి నివేదిక ఇవ్వాలి
ఐ అండ్ పీఆర్ అధికారులకు ధర్మాసనం ఆదేశం
(హైదరాబాద్, న్యూస్ ఇన్)
జర్నలిస్టుల అక్రిడిటేషన్ కార్డుల రెన్యువల్ వ్యవహారంలో తెలంగాణ హైకోర్టు కీలక ఆదేశాలు జారీ చేసింది. గతంలో న్యాయస్థానం ఇచ్చిన ఆదేశాలను అమలు చేసిన తీరుపై పూర్తి వివరాలు, ఆధారాలతో కూడిన నివేదికను నవంబర్ 23, 2026లోగా సమర్పించాలని సమాచార, పౌర సంబంధాల శాఖ (ఐ అండ్ పీఆర్) అధికారులను ఆదేశించింది. తెలంగాణ ఉర్దూ వర్కింగ్ జర్నలిస్ట్స్ ఫెడరేషన్ (TUWJF) దాఖలు చేసిన కోర్టు ధిక్కరణ పిటిషన్‌పై శుక్రవారం ధర్మాసనం విచారణ చేపట్టింది.తాత్కాలిక ప్రధాన న్యాయమూర్తి జస్టిస్ పి. సామ్ కోషి, జస్టిస్ నర్సింహారావు నందికొండలతో కూడిన ధర్మాసనం ఈ పిటిషన్‌ను విచారించింది. సెప్టెంబర్ 29 నుంచే సంబంధిత అధికారులు కోర్టు ఆదేశాల అమలు కోసం ఎదురుచూస్తున్నారని పేర్కొంది. నవంబర్ 5న కూడా కౌంటర్ అఫిడవిట్ దాఖలుకు గడువు కోరినప్పటికీ, విచారణ సమయానికి దాన్ని సమర్పించకపోవడాన్ని ధర్మాసనం గుర్తించింది.
ఆదేశాలు అమలు చేశామన్న ప్రభుత్వం..
గతంలో కోర్టు ఇచ్చిన ఆదేశాలను అమలు చేశామని ప్రభుత్వ శాఖ తరఫు ప్రతినిధులు ధర్మాసనానికి తెలిపారు. అయితే, ఆదేశాలు అమలైనట్లయితే అందుకు సంబంధించిన ఆధారాలు, పత్రాలను కోర్టు ముందు ఉంచాలని ఫెడరేషన్ తరఫు న్యాయవాది బర్కత్ అలీ ఖాన్ అభ్యంతరం వ్యక్తం చేశారు.ఫెడరేషన్ కార్యదర్శి సయ్యద్ గౌస్ మొహియుద్దీన్ సెప్టెంబర్ 29, అక్టోబర్ 31 తేదీల్లో ఐ అండ్ పీఆర్ శాఖకు పంపిన లేఖలను న్యాయవాది ప్రస్తావించారు. అక్రిడిటేషన్ కార్డుల రెన్యువల్ కావాల్సిన జర్నలిస్టుల జాబితాను కూడా వాటితో పాటు పంపినట్లు తెలిపారు.అలాగే, ఏప్రిల్ 30న ఐ అండ్ పీఆర్ శాఖ ఆర్టీసీకి పంపిన లేఖ జర్నలిస్టుల బస్ పాసులకు సంబంధించినదేనని, అక్రిడిటేషన్ కార్డుల రెన్యువల్‌తో దానికి సంబంధం లేదని స్పష్టం చేశారు.
నవంబర్ 23న తదుపరి విచారణ
ఇరుపక్షాల వాదనలు విన్న ధర్మాసనం పూర్తి నివేదిక సమర్పించాలని అధికారులను ఆదేశిస్తూ తదుపరి విచారణను నవంబర్ 23కు వాయిదా వేసింది. అక్రిడిటేషన్ కార్డుల రెన్యువల్‌కు సంబంధించిన ప్రధాన రిట్ పిటిషన్ విచారణ నవంబర్ 25న జరగనుంది.