TGSRTC బంపర్ ఆఫర్.. 15 రోజుల చార్జీతో నెల రోజుల బస్ పాస్
-మహిళలకు భారీ రాయితీ
-ఎంఎస్‌టీపై 9 ప్రత్యేక సదుపాయాలు
-ఆదివారం సిటీ బస్సుల్లో ఉచిత ప్రయాణం
(హైదరాబాద్, న్యూస్ ఇన్)
నిత్యం బస్సుల్లో ప్రయాణించే వారికి తెలంగాణ రాష్ట్ర రోడ్డు రవాణా సంస్థ (TGSRTC) తీపి కబురు అందించింది. నెలవారీ సీజన్ టికెట్ల (ఎంఎస్‌టీ)పై తొమ్మిది రకాల అదనపు సౌకర్యాలు, రాయితీలను ప్రకటించింది. ముఖ్యంగా మహిళలు 15 రోజుల చార్జీ చెల్లించి నెల రోజుల పాటు ప్రయాణించే వెసులుబాటు కల్పించింది. ఈ కొత్త నిబంధనలు నవంబర్ 14, 2026 నుంచి రాష్ట్రవ్యాప్తంగా అమల్లోకి రానున్నాయి.
మహిళలకు ప్రత్యేక రాయితీ..
మహిళా ప్రయాణికులకు టీజీఎస్ ఆర్టీసీ ప్రత్యేక రాయితీ ప్రకటించింది. సాధారణంగా 20 రోజుల ప్రయాణానికి లెక్కించే సీజన్ టికెట్ ఛార్జీలను మహిళలకు 15 రోజులకు మాత్రమే పరిమితం చేసింది. దీంతో నెలవారీ పాస్‌పై గణనీయమైన ఆదా కలగనుంది.అలాగే హైదరాబాద్, వరంగల్, నిజామాబాద్, నల్గొండ, కరీంనగర్ నగరాల్లో ఎంఎస్‌టీ కలిగిన వారు ఆదివారాల్లో అన్ని కేటగిరీల సిటీ బస్సుల్లో ఉచితంగా ప్రయాణించవచ్చు. అయితే పుష్పక్ ఎయిర్‌పోర్ట్ లైనర్ బస్సులు, ఇతర ప్రభుత్వ సెలవు రోజులకు ఈ వెసులుబాటు వర్తించదు.
దూర పరిమితి ఎత్తివేత.. రూ.20తో బస్సు అప్‌గ్రేడ్
ఎంఎస్‌టీ జారీకి ఇప్పటివరకు ఉన్న దూర పరిమితిని తొలగించారు. టోల్ ఛార్జీలను 25 రోజులకు బదులుగా 20 రోజులకు మాత్రమే లెక్కించనున్నారు. కొత్తగా డీలక్స్ నెలవారీ పాస్‌లను ప్రవేశపెట్టడంతోపాటు ఇ-డీలక్స్ బస్సుల్లోనూ ప్రయాణించే అవకాశం కల్పించారు.అదనంగా రూ.20 చెల్లించి కాంబి టికెట్ తీసుకుంటే పల్లెవెలుగు పాస్‌దారులు ఎక్స్‌ప్రెస్, ఇ-ఎక్స్‌ప్రెస్ బస్సుల్లో ప్రయాణించవచ్చు. ఎక్స్‌ప్రెస్ పాస్‌దారులకు డీలక్స్, ఇ-డీలక్స్ బస్సుల్లో ప్రయాణించే అవకాశం ఉంటుంది.
దీర్ఘకాలిక పాస్‌లపై అదనపు వ్యాలిడిటీ
ఇతర మార్గాల్లో ప్రయాణించే ఎంఎస్‌టీ వినియోగదారులకు సూపర్ లగ్జరీ, ఆపై కేటగిరీ బస్సుల బేసిక్ ఛార్జీపై 10 శాతం రాయితీ కల్పించారు. రెండు నెలల పాస్‌పై అదనంగా ఐదు రోజులు, మూడు నెలల పాస్‌పై పది రోజుల వ్యాలిడిటీ ఉచితంగా ఇస్తారు.ఈ కొత్త సదుపాయాలను విద్యార్థులు, ఉద్యోగులు, నిత్య ప్రయాణికులు సద్వినియోగం చేసుకోవాలని టీజీఎస్ ఆర్టీసీ కోరింది.