(న్యూస్ఇన్,హైదరాబాద్)
గత మూడేళ్లుగా ఇప్పటివరకు రాష్ట్రంలో 7,563 ఎస్సీ, ఎస్టీ అట్రాసిటీస్ కేసులు నమోదైనట్లు మంత్రి అడ్లూరి లక్ష్మణ్ వెల్లడించారు. నమోదైన కేసుల దర్యాప్తు, విచారణ, పరిష్కారం, బాధితులకు అందుతున్న ఆర్థిక సహాయం, పునరావాసంపై సీఎం రేవంత్రెడ్డి సమీక్ష నిర్వహించారు. తాజా పరిస్థితులను అధికారులను వివరాలు అడిగి తెలుసుకున్నారని మంత్రి చెప్పారు.
తెలంగాణాలో తొలిసారి…
తెలంగాణ ఏర్పడిన తర్వాత తొలిసారిగా ముఖ్యమంత్రి ఎ. రేవంత్రెడ్డి అధ్యక్షతన ఎస్సీ, ఎస్టీ అట్రాసిటీస్ నిరోధక చట్టం–1989పై రాష్ట్ర స్థాయి ఉన్నతస్థాయి నిఘా, పర్యవేక్షణ కమిటీ సమావేశం జరిగింది. బాధితులకు సత్వర న్యాయం, పరిహారం, పునరావాసం అందేలా చర్యలు తీసుకోవాలని సమావేశంలో నిర్ణయించినట్లు సంక్షేమ శాఖ మంత్రి అడ్లూరి లక్ష్మణ్కుమార్ తెలిపారు.
బడ్జెట్తో సంబంధం లేకుండా పరిహారం….
ఎస్సీ, ఎస్టీ అట్రాసిటీస్ బాధితులకు అందాల్సిన నష్టపరిహారాన్ని బడ్జెట్ కేటాయింపులతో ముడిపెట్టకుండా గ్రీన్ ఛానల్ ద్వారా సత్వరమే విడుదల చేయాలని అధికారులను ఆదేశించినట్లు మంత్రి పేర్కొన్నారు. దళితులు కోరుకునేది ఆత్మగౌరవం, సమానత్వం, భద్రత అని అన్నారు.
గత ప్రభుత్వంపై మంత్రి విమర్శలు…..
బీఆర్ఎస్ ప్రభుత్వం రాష్ట్ర స్థాయి ఎస్సీ, ఎస్టీ విజిలెన్స్–మానిటరింగ్ సమావేశాన్ని ఎందుకు నిర్వహించలేదని మంత్రి ప్రశ్నించారు. దళితులపై దాడులు, అత్యాచారాలు, వేధింపుల విషయంలో గత ప్రభుత్వం తగిన శ్రద్ధ చూపలేదని విమర్శించారు. ఇటీవల దళితుల ఆత్మగౌరవానికి సంబంధించిన ఘటనపై సమావేశంలో చర్చించి, కఠిన చర్యలు తీసుకునేలా నిర్ణయించినట్లు తెలిపారు.
విద్య, సంక్షేమానికి ప్రాధాన్యం…..
ఇందిరమ్మ స్ఫూర్తితో కాంగ్రెస్ ప్రభుత్వం పనిచేస్తోందని మంత్రి తెలిపారు. జనాభా దామాషా ప్రకారం బడ్జెట్లో నిధులు కేటాయిస్తున్నామని చెప్పారు. ఇందిరమ్మ ఇళ్లలో 31 శాతం దళితులకు, 17 శాతం ఎస్టీలకు కేటాయించినట్లు వెల్లడించారు. 27.5 లక్షల మంది విద్యార్థులకు నర్సరీ నుంచి 12వ తరగతి వరకు అల్పాహారం, 3.48 కోట్ల మందికి సన్నబియ్యం అందిస్తున్నట్లు పేర్కొన్నారు.ఎస్సీ, ఎస్టీ, బీసీ, మైనార్టీ సంక్షేమ హాస్టళ్లకు ప్రతి నెల మొదటి వారంలోనే కాస్మొటిక్, మెస్ ఛార్జీలు అందేలా చర్యలు తీసుకుంటున్నట్లు మంత్రి తెలిపారు. చదువు మాత్రమే జీవితాలను మార్చగలదని, అట్టడుగు వర్గాల పిల్లలను విద్యతో పాటు క్రీడల వైపు కూడా ప్రోత్సహించాలని పిలుపునిచ్చారు.
Fallow us on…..https://whatsapp.com/channel/0029Vb7fQokJENxuemz6EL3X
Leave a Reply