(న్యూస్ఇన్,హైదరాబాద్)
ఆదిలాబాద్, వరంగల్ విమానాశ్రయాలతో పాటు ఢిల్లీలో నిర్మిస్తున్న తెలంగాణ భవన్ తెలంగాణ చరిత్ర, సంస్కృతి, శిల్పకళకు ప్రతిబింబంగా నిలిచేలా నిర్మాణాలు చేపట్టాలని ముఖ్యమంత్రి ఎ. రేవంత్రెడ్డి అధికారులను ఆదేశించారు. ఆయా నిర్మాణాల డిజైన్లను పరిశీలించిన సీఎం.. కాకతీయ కళాతోరణం, రామప్ప ఆలయం, పిల్లలమర్రి వంటి తెలంగాణ ప్రత్యేకతను చాటే నిర్మాణాల శిల్ప, వాస్తు కళలను పరిగణనలోకి తీసుకోవాలని సూచించారు.
శాఖల మధ్య సమన్వయంతో పనులు….
ఆదిలాబాద్, వరంగల్ విమానాశ్రయాల నిర్మాణాలపై మంగళవారం సచివాలయంలో సీఎం రేవంత్రెడ్డి సమీక్ష నిర్వహించారు. విమానాశ్రయాల నిర్మాణ ప్రాంతాల్లో విద్యుత్ లైన్ల మార్పు, వాగుల ప్రవాహాల మళ్లింపు, రహదారుల మార్పు, బీఎస్ఎన్ఎల్ లైన్లు, తాగునీటి సరఫరా పైప్లైన్ల మార్పు తదితర అంశాలను అధికారులు ముఖ్యమంత్రికి వివరించారు.
వివిధ శాఖలు విడివిడిగా పనులు చేపట్టడం వల్ల జాప్యం, ఇబ్బందులు తలెత్తే అవకాశం ఉందని సీఎం పేర్కొన్నారు. విద్యుత్, ఆర్అండ్బీ, తాగునీటి సరఫరా, నీటిపారుదల శాఖలు సమన్వయంతో పనిచేస్తూ బీఎస్ఎన్ఎల్ అధికారులతో చర్చించి పనులను ఏకకాలంలో చేపట్టాలని సూచించారు.
భవిష్యత్ అవసరాలకూ ప్రణాళిక….
విమానాశ్రయాల ప్రస్తుత అవసరాలతో పాటు భవిష్యత్ అవసరాలను కూడా దృష్టిలో పెట్టుకుని సమగ్ర ప్రణాళిక రూపొందించాలని సీఎం ఆదేశించారు. విమానాశ్రయాల కాంపౌండ్ వాల్ సమీపం నుంచి రహదారులు నిర్మించి, వాటిని జిల్లా, రాష్ట్ర, జాతీయ రహదారులతో అనుసంధానించాలని సూచించారు. రహదారులు విశాలంగా ఉండేలా చూడాలని స్పష్టం చేశారు.
వాగులు, నీటి ప్రవాహాలను మళ్లించాల్సి వస్తే విమానాశ్రయ ప్రాంగణంలో లేదా సమీపంలో చెరువులు నిర్మించి, అక్కడి నుంచి నీటి ప్రవాహాలను మళ్లించేలా చర్యలు తీసుకోవాలని సూచించారు. నిర్దేశిత గడువులో పనులు పూర్తయ్యేలా చూడాలని అధికారులను ఆదేశించారు.
డిజైన్లలో మార్పులకు సూచనలు…….
ఆదిలాబాద్, వరంగల్ విమానాశ్రయాలు, ఢిల్లీ తెలంగాణ భవన్ డిజైన్లను సీఎం పరిశీలించారు. ప్రతి నిర్మాణంలో తెలంగాణ సంస్కృతి, శిల్ప, వాస్తు కళలకు ప్రాధాన్యం ఇవ్వాలని సూచిస్తూ పలు ఆకృతుల్లో మార్పులు చేయాలని అధికారులకు సూచనలు చేశారు.
Fallow us on…..https://whatsapp.com/channel/0029Vb7fQokJENxuemz6EL3X
Leave a Reply