రాష్ట్రంలో ప‌రిస్థితుల‌పై చ‌ర్చ‌కు సిద్ధం….రేవంత్ సిద్ధ‌మా…!

(హైద‌రాబాద్,న్యూస్ఇన్‌)

రాష్ట్రంలో జరుగుతున్నదే చెత్తపాలన అని, దాని గురించి మళ్ళీ చర్చ పెడదామని రేవంత్ అనడం పైన కేటీఆర్ స్పందించారు. నిజానికి రేవంత్ రెడ్డికి దమ్ముంటే తనతో చర్చకు రావాలన్నారు.రేవంత్ రెడ్డి వైఫల్యాన్ని ఎండగట్టకుంటే అక్కడే రాజీనామా పత్రం ఇచ్చి శాశ్వతంగా రాజకీయాల నుంచి తప్పుకుంటా, ఈ సవాలుకు సిద్ధమా అని కేటీఆర్ ప్రశ్నించారు.రాష్ట్రంలో కాంగ్రెస్ నేత‌ల దోపిడి కార‌ణంగానే రాష్ట్రం దివాళా తీస్తోంద‌ని కేటిఆర్ ఆరోపించారు. సీఎం రేవంత్ రెడ్డి భావ దారిద్య్రంతో మాట్లాడుతున్నారు. తెలంగాణ రాష్ట్రం పైన విషం చిమ్ముతున్నాడన్నారు. ఒకసారి దివాలా అంటాడు, మరోసారి ఎయిడ్స్ రోగి అంటాడు, మరోసారి క్యాన్సర్ పేషెంట్ అంటాడు. తాను ప్రాతినిధ్యం వహిస్తున్న రాష్ట్రం గురించి ఇంత నీచంగా మాట్లాడే ముఖ్యమంత్రి దేశంలో ఎవరూ లేరన్నారు. ఢిల్లీకి పోతే ఇజ్జత్ లేదు అని చెప్పుకుంటున్న రేవంత్ రెడ్డి, మరి 72 సార్లు ఎందుకు ఢిల్లీకి వెళ్ళాడో చెప్పాలి. 30 నెలల్లో 72 సార్లు ఢిల్లీకి వెళ్లి ఎవరిని బతిమాలుకోవడానికి వెళ్తున్నారో ప్రజలకు చెప్పాలి. నిజంగానే రేవంత్ రెడ్డికి చిత్తశుద్ధి ఉంటే, రెండున్నర సంవత్సరాల పాటు ఇక ఢిల్లీకి వెళ్లకుండా తెలంగాణలోనే ఉండి పరిపాలన చేసి తన నిబద్ధత చాటుకోవాలన్నారు. అప్పుల పేరుతో రేవంత్ రెడ్డి అబద్ధాలు చెప్తున్నాడు. కానీ బి.జె.పి ఎం.పి రఘునందన్ రావు అడిగిన ప్రశ్నకు సమాధానంగా తెలంగాణ అప్పులు కేవలం రెండు లక్షల డెబ్బై వేల కోట్లు మాత్రమే అని స్పష్టంగా కేంద్ర ప్రభుత్వం చెప్పిందన్నారు.

ఒకవైపు డబ్బులు లేవు అనుకుంటూనే, 200 కోట్ల రూపాయలతో తన సొంత ఇష్టాల మేరకు ఒక రాజభవనం నిర్మించుకుంటున్నారు. దానికి ఆయన సతీమణి తో అర్ధరాత్రి పూజలు చేస్తున్నారు. ఎలాంటి తప్పు చేయకుంటే ఎందుకు అర్ధరాత్రి దొంగ చాటుగా పూజలు నిర్వహించారో చెప్పాలని కే.టి.ఆర్ ప్రశ్నించారు.ఇప్పటికైనా రేవంత్ రెడ్డి అడ్డగోలుగా రాష్ట్రం గురించి మాట్లాడటం, రాష్ట్ర ప్రజల ఆత్మస్థైర్యాన్ని, రాష్ట్రం యొక్క ఆత్మగౌరవాన్ని దెబ్బతీసే విధంగా మాట్లాడవద్దని కేటీఆర్ విజ్ఞప్తి చేశారు. రాష్ట్రంలోని ప్రతి ఒక్కరూ రేవంత్ రెడ్డి పాలన పైన కోపంగా ఉన్నారని, అన్ని గమనిస్తున్నారని, చివరికి రానున్న రోజుల్లో బాహుబలి సినిమాలో భల్లాల దేవునికి పట్టిన గతే పడుతుందని అన్నారు. తాను నమ్మిన హిట్లర్ కి ఎలాంటి ముగింపు కలిగిందో అలాంటి ముగింపే ప్రజలు రేవంత్ రెడ్డి రాజకీయ జీవితానికి ఇస్తారని కేటీఆర్ అన్నారు.