దేశంలోనే తొలి ఏఐ పోలీస్ స్టేషన్‌గా పంజాగుట్ట.. డిసెంబర్‌లో ప్రారంభం
ఫిర్యాదు స్వీకరణ నుంచి ఛార్జ్‌షీట్‌ వరకు ఏఐ సేవలు
(హైదరాబాద్,క్రైం బ్యూరో)
దేశంలోనే తొలి కృత్రిమ మేధ (ఏఐ) ఆధారిత పోలీస్ స్టేషన్‌గా పంజాగుట్ట ఠాణాను తీర్చిదిద్దుతున్నట్లు నగర పోలీస్ కమిషనర్ వీసీ స‌జ్జనార్ వెల్లడించారు. డిసెంబర్ మొదటి వారంలో డీజీపీ సీవీ ఆనంద్ చేతుల మీదుగా పైలట్ ప్రాజెక్టుగా దీన్ని ప్రారంభించనున్నట్లు తెలిపారు. పంజాగుట్ట పోలీస్ స్టేషన్‌ను ఆకస్మికంగా తనిఖీ చేసిన సీపీ.. ఫిర్యాదుదారులతో మాట్లాడి వారి సమస్యలను తెలుసుకున్నారు. స్టేషన్‌లో కొనసాగుతున్న ఏఐ సాంకేతిక ఏర్పాట్లను అధికారులతో కలిసి పరిశీలించారు.
ఇప్పటికే రిసెప్షన్‌లో ఏర్పాటు చేసిన ‘సేతు’ కియోస్క్ ద్వారా దాదాపు 10 భాషల్లో ఫిర్యాదులు స్వీకరించే సదుపాయం కల్పించారు. ఏఐ సాంకేతికత ఫిర్యాదులను స్థానిక భాషలోకి అనువదించి సంబంధిత అధికారులకు పంపుతుంది. ఎఫ్‌ఐఆర్‌ నమోదు, కేసు డైరీ, దర్యాప్తు నివేదికలు, ఛార్జ్‌షీట్‌ రూపకల్పనలోనూ ఏఐ సేవలను వినియోగించనున్నారు.
పోలీస్ స్టేషన్ పరిధిలోని రద్దీ ప్రాంతాలు, హాస్టళ్లు, వాణిజ్య సముదాయాలు, నేరాల చరిత్రను విశ్లేషించి బ్లూకోల్ట్స్, పెట్రోలింగ్ వ్యవస్థను మెరుగుపరచనున్నట్లు స‌జ్జనార్ తెలిపారు. పైలట్ ప్రాజెక్టు ఫలితాలను పరిశీలించిన అనంతరం ఈ విధానాన్ని రాష్ట్రవ్యాప్తంగా అమలు చేసే అంశంపై నిర్ణయం తీసుకోనున్నట్లు వెల్లడించారు.