ఏపీలో మరో రెండు భారీ రెన్యూ ప్రాజెక్టులు.. రూ.29,500 కోట్ల పెట్టుబడులు

(విశాఖపట్నం, న్యూస్ఇన్)

ఆంధ్రప్రదేశ్‌లో పునరుత్పాదక ఇంధన రంగానికి మరింత ఊతమిచ్చేలా రెన్యూ సంస్థ మరో రెండు భారీ ప్రాజెక్టుల ఏర్పాటుకు ముందుకొచ్చింది. వీటి ద్వారా రాష్ట్రంలో రూ.29,500 కోట్ల పెట్టుబడులు పెట్టనుంది. రెన్యూ ఛైర్మన్, సీఈవో సుమంత్ సిన్హాతో రాష్ట్ర విద్య, ఐటీ, ఎలక్ట్రానిక్స్ శాఖల మంత్రి నారా లోకేష్ విశాఖపట్నంలో సమావేశమయ్యారు. ఈ భేటీ అనంతరం కొత్త ప్రాజెక్టులకు సంబంధించి సంస్థ ప్రతినిధులు, ప్రభుత్వ అధికారుల మధ్య ఒప్పందం కుదిరింది.

ఒప్పందంలో భాగంగా 2 గిగావాట్ల సామర్థ్యంతో పంప్డ్ స్టోరేజ్ ప్రాజెక్టు ఏర్పాటుకు రూ.12,500 కోట్లు, గ్రీన్ అమ్మోనియా, ఈ-ఫ్యూయల్ ప్రాజెక్టు కోసం రూ.17,000 కోట్లు వెచ్చించనున్నారు. వీటితో పాటు మరో రూ.11 వేల కోట్లతో పాలీ సిలికాన్, మెటలర్జికల్ గ్రేడ్ సిలికాన్ ప్రాజెక్టును కూడా ఏపీలో ఏర్పాటు చేసేందుకు రెన్యూ సంస్థ సూత్రప్రాయంగా అంగీకరించింది.

ప్రాజెక్టుల ఏర్పాటుకు అవసరమైన అనుమతులు, మౌలిక సదుపాయాలు, ఇతర సహాయ సహకారాలను ప్రభుత్వం అందిస్తుందని మంత్రి లోకేష్ తెలిపారు. పెట్టుబడి ప్రతిపాదనలను త్వరితగతిన కార్యరూపంలోకి తీసుకురావాలని కోరారు. యూనివర్సిటీ ఆఫ్ న్యూ సౌత్ వేల్స్ సహకారంతో తిరుపతి ఐఐటీలో ఏర్పాటు చేయనున్న సోలార్ సెల్ ప్రోటోటైపింగ్ కేంద్రంలోనూ భాగస్వామ్యం కావాలని రెన్యూకు సూచించారు.

రెన్యూ సంస్థ 2015లో కళ్యాణదుర్గంలో 24 మెగావాట్ల విండ్ ప్రాజెక్టుతో ఏపీలో కార్యకలాపాలు ప్రారంభించిందని సుమంత్ సిన్హా తెలిపారు. ప్రస్తుతం పది ప్రాంతాల్లో 717 మెగావాట్ల విండ్, 60 మెగావాట్ల సోలార్ ప్రాజెక్టులను నిర్వహిస్తున్నట్లు వెల్లడించారు. గుంతకల్లులో రూ.22 వేల కోట్లతో 1.8 గిగావాట్ల సోలార్, 1 గిగావాట్ విండ్, 2 గిగావాట్ గంటల బ్యాటరీ నిల్వ సామర్థ్యంతో భారీ హైబ్రిడ్ ప్రాజెక్టును నిర్మిస్తున్నట్లు వివరించారు.

అనకాపల్లి జిల్లా మాకవరపాలెంలో రూ.85,200 కోట్లతో గ్రీన్ డేటా సెంటర్, రాంబిల్లిలో రూ.4,200 కోట్లతో ఇంగాట్, వేఫర్ ప్లాంట్ పనులు కూడా చేపట్టినట్లు చెప్పారు. కొత్త పెట్టుబడులతో ఏపీ పునరుత్పాదక ఇంధన రంగంలో మరింత కీలక కేంద్రంగా ఎదిగే అవకాశముంది.