తెలంగాణపై విషం చిమ్మొద్దు.. పెట్టుబడులే లక్ష్యంగా ముందుకెళ్తున్నాం: సీఎం రేవంత్ రెడ్డి
-భారత్ సమ్మిట్‌కు 70 దేశాల నుంచి వెయ్యి మంది ప్రతినిధులు
-2034 నాటికి ట్రిలియన్ డాలర్ల ఆర్థిక వ్యవస్థగా తెలంగాణ
(హైదరాబాద్, న్యూస్ ఇన్)
తెలంగాణ అభివృద్ధి, పెట్టుబడుల ఆకర్షణే లక్ష్యంగా తమ ప్రభుత్వం ముందుకు సాగుతోందని ముఖ్యమంత్రి రేవంత్ రెడ్డి స్పష్టం చేశారు. రాష్ట్రానికి పెట్టుబడులు తీసుకురావడం, ప్రపంచ పారిశ్రామిక వర్గాలకు తెలంగాణను పరిచయం చేయడమే లక్ష్యంగా భారత్ సమ్మిట్ నిర్వహిస్తున్నామని తెలిపారు. తెలంగాణ ప్రజలకు మేలు చేసే నిర్ణయాలను కూడా బీజేపీ, బీఆర్ఎస్ వ్యతిరేకిస్తున్నాయని విమర్శించారు. రాజకీయ విభేదాలను రాష్ట్ర ప్రయోజనాలకు అడ్డంకిగా మార్చొద్దని హితవు పలికారు.
డిసెంబర్‌లో ఇన్వెస్ట్ తెలంగాణ గ్లోబల్ సమ్మిట్
నవంబర్ 13, 14 తేదీల్లో నిర్వహిస్తున్న భారత్ సమ్మిట్‌కు 70 దేశాల నుంచి సుమారు వెయ్యి మంది ప్రతినిధులు హాజరవుతున్నారని సీఎం వెల్లడించారు. వివిధ రంగాల్లో కీలక హోదాల్లో ఉన్న ప్రముఖులను ఆహ్వానించామని, వారు హైదరాబాద్‌ను ప్రత్యక్షంగా సందర్శించి రాష్ట్ర పారిశ్రామిక విధానాలు, పెట్టుబడుల అవకాశాలను తెలుసుకుంటారని చెప్పారు. ఈ సమ్మిట్‌కు హాజరయ్యే అతిథులంతా భవిష్యత్తులో తెలంగాణ బ్రాండ్ అంబాసిడర్లుగా మారుతారని ఆశాభావం వ్యక్తం చేశారు.
డిసెంబర్ 7, 8, 9 తేదీల్లో ఇన్వెస్ట్ తెలంగాణ గ్లోబల్ సమ్మిట్ నిర్వహించనున్నట్లు తెలిపారు. ఇందులో భాగంగా ఢిల్లీలో కర్టెన్ రైజర్ కార్యక్రమం నిర్వహించామని, త్వరలో ముంబై, అహ్మదాబాద్‌లోనూ చేపట్టనున్నట్లు వివరించారు. 2034 నాటికి ఒక ట్రిలియన్ డాలర్ల ఆర్థిక వ్యవస్థగా, 2047 నాటికి మూడు ట్రిలియన్ డాలర్ల ఆర్థిక వ్యవస్థగా తెలంగాణను తీర్చిదిద్దడమే తమ లక్ష్యమన్నారు.
రాహుల్ పర్యటనపై బీజేపీ విమర్శలేంటి?
భారత్ సమ్మిట్‌కు ఆహ్వానించిన కొందరికి తొలుత అనుమతులు ఇచ్చిన కేంద్రం, ఆ తర్వాత నిరాకరించిందని రేవంత్ రెడ్డి ఆరోపించారు. సమ్మిట్ ముగింపు సందేశం ఇచ్చేందుకు రాహుల్ గాంధీ హైదరాబాద్ వస్తున్నారని తెలిపారు. ప్రధాని మోదీ విదేశాల్లో పర్యటిస్తూ ప్రసంగాలు, సదస్సులు నిర్వహిస్తే తప్పులేదని, రాహుల్ గాంధీ తెలంగాణకు వస్తే బీజేపీ విమర్శలు చేయడం ఏమిటని ప్రశ్నించారు. ప్రధాన ప్రతిపక్ష నేతను వ్యతిరేకించడం ప్రజాస్వామ్యానికి విరుద్ధమని వ్యాఖ్యానించారు.
గిగ్ వర్కర్లకు రేపటి నుంచే కొత్త పాలసీ
గిగ్ వర్కర్ల సంక్షేమం కోసం తమ ప్రభుత్వం ప్రత్యేక చట్టాన్ని అమలు చేయబోతోందని సీఎం ప్రకటించారు. రాహుల్ గాంధీ చేతుల మీదుగా గిగ్ వర్కర్స్ పాలసీ అమలును ప్రారంభించనున్నట్లు వెల్లడించారు. కేంద్ర ప్రభుత్వానికి గిగ్ వర్కర్లను ఆదుకోవాలనే ఆలోచన లేదని విమర్శించారు.
అభివృద్ధి పనులను అడ్డుకోవద్దు
మూసీ ప్రక్షాళన, మెట్రో విస్తరణ, రీజినల్ రింగ్ రోడ్డు, తుమ్మిడిహట్టి వంటి ప్రాజెక్టులను బీజేపీ, బీఆర్ఎస్ వ్యతిరేకిస్తున్నాయని సీఎం ఆరోపించారు. వారు వ్యతిరేకించేది కాంగ్రెస్ పార్టీని కాదని, తెలంగాణ ప్రజల ప్రయోజనాలను అని వ్యాఖ్యానించారు. ప్రపంచ శాంతి, ప్రజాస్వామ్యంపై చర్చ జరగాల్సిన అవసరం ఉందని పేర్కొంటూ, బీజేపీ నేతలు ఇప్పటికైనా విజ్ఞత ప్రదర్శించాలని కోరారు. రాజకీయాల కోసం రాహుల్ గాంధీ పర్యటనను వివాదం చేయవద్దని హితవు పలికారు.