జాతీయంతాజా వార్త‌లుతెలంగాణారాజ‌కీయం

ప్రతి డెలివరీలో గిగ్ వర్కర్లకు వాటా.. వారి శ్రమకు కాంగ్రెస్ రక్షణ: రాహుల్ గాంధీ

(హైదరాబాద్,న్యూస్ఇన్)

గిగ్ వర్కర్ల శ్రమకు తగిన గుర్తింపు, ఆర్థిక భద్రత కల్పించడమే కాంగ్రెస్ ప్రభుత్వ లక్ష్యమని లోక్‌సభలో ప్రతిపక్ష నేత రాహుల్ గాంధీ అన్నారు. ప్రతి డెలివరీ, ప్రతి రవాణా ద్వారా వచ్చే ఆదాయంలో ఒక శాతం గిగ్ వర్కర్ల సంక్షేమం కోసం కేటాయించే విధానం అమలవుతోందని వెల్లడించారు. గిగ్ వర్కర్లకు విశ్రాంతి సదుపాయాలతో పాటు బీమా, పింఛన్, ఆరోగ్య, విద్యా సదుపాయాలు కల్పిస్తామని స్పష్టం చేశారు.గిగ్ వర్కర్ల సభలో పాల్గొన్న రాహుల్ గాంధీ వారిని ఆప్యాయంగా పలకరిస్తూ, వారి సమస్యలు, కష్టాలను అడిగి తెలుసుకున్నారు. ఎండలో మోటార్ సైకిళ్లపై తిరుగుతూ డెలివరీలు చేసే కార్మికుల శ్రమ తనకు తెలుసని అన్నారు. గిగ్ వర్కర్ల కష్టాన్ని గుర్తించి, వారికి అండగా నిలుస్తామని గతంలో ఇచ్చిన హామీని కాంగ్రెస్ ప్రభుత్వం నిలబెట్టుకుందని పేర్కొన్నారు.

సరైన సమాచారం లేదు….

దేశంలో ఇప్పటివరకు గిగ్ వర్కర్లకు సంబంధించిన సమగ్ర సమాచారం అందుబాటులో లేదని రాహుల్ అన్నారు. ఒక డెలివరీకి ఎంత సమయం పడుతోంది? అందుకు ఎంత చెల్లిస్తున్నారు? వంటి వివరాలు కూడా కార్మికులకు స్పష్టంగా తెలియని పరిస్థితి ఉందన్నారు. కష్టపడేది కార్మికులైనా, వారి శ్రమకు సంబంధించిన సమాచారం వారి దగ్గరే లేకపోవడం ఆందోళనకరమని వ్యాఖ్యానించారు. ఈ పరిస్థితిని మార్చేందుకు తెలంగాణ ప్రభుత్వం పనిచేస్తోందని, ప్రతి డెలివరీకి సంబంధించిన చెల్లింపుల వివరాలను కార్మికులకు తెలియజేస్తోందని చెప్పారు.

Cm Revanth GIG workers Bike Rally

గిగ్ వర్కర్లు ఎండలో పనిచేసిన తర్వాత విశ్రాంతి తీసుకునేందుకు గతంలో సరైన వసతులు ఉండేవి కావని రాహుల్ గుర్తుచేశారు. ఈ సమస్యను పరిష్కరించేందుకు హైదరాబాద్‌తో పాటు తెలంగాణలోని ఇతర నగరాల్లో ప్రభుత్వం రెస్ట్ హౌజ్‌లు నిర్మించిందని తెలిపారు. అనారోగ్యం, ప్రమాద సమయాల్లో ఆర్థిక భరోసా కల్పించేందుకు రూ.5 లక్షల ఆరోగ్య బీమా, రూ.10 లక్షల ప్రమాద బీమా సదుపాయాలు అందిస్తున్నట్లు వివరించారు. భవిష్యత్తులో పింఛన్‌తో పాటు ఇతర సంక్షేమ సదుపాయాలు కూడా అందుతాయని చెప్పారు.ప్రతి డెలివరీ, రవాణా లావాదేవీపై ఒక శాతం మొత్తాన్ని గిగ్ వర్కర్ల సంక్షేమ బోర్డుకు జమ చేసి, అక్కడి నుంచి కార్మికులకు ప్రయోజనం చేకూర్చే విధానం ఉందని రాహుల్ వివరించారు.

దోపిడీ చేయడానికి బిజెపి విధానాలు

దేశంలో రెండు భిన్నమైన ఆలోచనా విధానాలు ఉన్నాయని ఆయన వ్యాఖ్యానించారు. బీజేపీ, ఆర్ఎస్ఎస్ విధానం కార్మికులతో నిరంతరం పనిచేయించుకుంటూ వారి శ్రమను కార్పొరేట్ సంస్థలకు దోచిపెడుతోందని విమర్శించారు. మరోవైపు కాంగ్రెస్ విధానం గిగ్ వర్కర్లను దేశానికి పునాదిగా, అభివృద్ధిలో భాగస్వాములుగా గుర్తిస్తుందని చెప్పారు. కార్మికులకు ప్రతి డెలివరీలో వాటా రావాలని, విశ్రాంతి, భద్రత కల్పించాలని కాంగ్రెస్ కోరుకుంటోందన్నారు.

Gig Workers Rally

ప్రధాని మోదీ విధానం కార్మికులకు ఏమీ దక్కకుండా చేస్తోందని విమర్శించిన రాహుల్ గాంధీ.. రేవంత్ రెడ్డి నాయకత్వంలోని తెలంగాణ ప్రభుత్వం గిగ్ వర్కర్లకు అండగా ఉంటుందని భరోసా ఇచ్చారు. వారి పిల్లల విద్య, కుటుంబ ఆరోగ్య బాధ్యతల్లోనూ ప్రభుత్వం తోడుగా నిలుస్తుందని చెప్పారు. ఎవరూ భయపడాల్సిన అవసరం లేదని, కాంగ్రెస్ పార్టీ అండగా ఉంటుందని భరోసా ఇస్తూ జై హింద్, జై తెలంగాణ నినాదాలతో ప్రసంగాన్ని ముగించారు.

Leave a Reply

Your email address will not be published. Required fields are marked *