తాజా వార్త‌లుతెలంగాణారాజ‌కీయం

రాహుల్ గాంధీకి కేటీఆర్ సూటి ప్రశ్నలు.. తెలంగాణ పర్యటనపై తీవ్ర విమర్శలు

(హైదరాబాద్,న్యూస్ఇన్)

కాంగ్రెస్ అగ్రనేత రాహుల్ గాంధీ హైదరాబాద్ పర్యటన నేపథ్యంలో బీఆర్ఎస్ వర్కింగ్ ప్రెసిడెంట్ కేటీఆర్ తీవ్ర విమర్శలు గుప్పించారు. తెలంగాణలో కాంగ్రెస్ ప్రభుత్వం అధికారంలోకి వచ్చిన తర్వాత చోటుచేసుకున్న పలు పరిణామాలపై రాహుల్ గాంధీ ఎందుకు మౌనంగా ఉన్నారని ప్రశ్నించారు. ప్రజా సమస్యలపై స్పందించకుండా ఇప్పుడు ప్రచార ఆర్భాటం కోసం తెలంగాణకు రావడం ఏమిటని నిలదీశారు.

అప్పుడు నిద్రపోయారా…

ఉద్యోగాలిస్తామని హామీ ఇచ్చి అధికారంలోకి వచ్చిన కాంగ్రెస్ ప్రభుత్వం.. ఉద్యోగాల కోసం పోరాడుతున్న నిరుద్యోగ విద్యార్థులపై పోలీసులతో దాడులు చేయించినప్పుడు రాహుల్ గాంధీ ఎక్కడున్నారని కేటీఆర్ ప్రశ్నించారు. లగచర్లలో భూముల కోసం పోరాడిన గిరిజన మహిళలను కొట్టి, దుస్తులు చింపి అవమానించిన ఘటనలపై ఎందుకు స్పందించలేదని నిలదీశారు. హైడ్రా బుల్డోజర్లతో పేద, మధ్యతరగతి ప్రజల ఇళ్లను కూల్చివేస్తున్నప్పుడు ఢిల్లీలో నిద్రపోతున్నారా అంటూ ఎద్దేవా చేశారు.

Rahul Gandhi Hyderabad Tour

కంచ గచ్చిబౌలి హెచ్‌సీయూ భూముల్లో రాత్రికి రాత్రే 10 వేలకు పైగా చెట్లను నరికివేసి, జింకలు, నెమళ్లు సహా జీవవైవిధ్యాన్ని దెబ్బతీసినప్పుడు రాహుల్ గొంతు ఎందుకు పెగల్లేదని ప్రశ్నించారు. కేబీఆర్ పార్కు విషయంలోనూ ఆయన మౌనంగా ఉన్నారని విమర్శించారు. పది మంది బీఆర్ఎస్ ఎమ్మెల్యేలను ప్రలోభపెట్టి కాంగ్రెస్‌లో చేర్చుకున్నప్పుడు రాజ్యాంగబద్ధమైన ప్రక్రియల గురించి ఎందుకు మాట్లాడలేదని నిలదీశారు.

ఎందుకు స్పందించలేదు…

మహిళా ప్రజాప్రతినిధులపై దాడులు, రైతుల ఆత్మహత్యలు, చేనేత కార్మికుల బలవన్మరణాలు, జర్నలిస్టుల అరెస్టులు, భూకబ్జాలు, కార్పొరేట్ అనుకూల విధానాలపై రాహుల్ ఎందుకు స్పందించడం లేదని కేటీఆర్ ప్రశ్నించారు. సొంత పార్టీ ఎమ్మెల్యేలు, మంత్రులే అవినీతి గురించి బహిరంగంగా మాట్లాడుతున్నా ఆయన మౌనం వీడటం లేదని విమర్శించారు.

తెలంగాణ ప్రజల సొమ్ముతో రూ.100 కోట్లు ఖర్చు చేసి ప్రచార పర్యటనలు చేయడానికి రాహుల్ గాంధీకి ఎవరు అధికారం ఇచ్చారని కేటీఆర్ ప్రశ్నించారు. తెలంగాణ ప్రజలు ఎదుర్కొంటున్న సమస్యలకు సమాధానం చెప్పే ధైర్యం ఉందా అంటూ రాహుల్ గాంధీకి సూటి ప్రశ్నలు సంధించారు.

Leave a Reply

Your email address will not be published. Required fields are marked *