ఏపీలో పెట్టుబడులకు భారీ అవకాశాలు.. ఆర్‌పీఎస్‌జీ గ్రూప్‌కు చంద్రబాబు ఆహ్వానం
- పారిశ్రామికవేత్తలకు ఫోన్ కాల్ దూరంలో ప్రభుత్వం
- గ్రీన్ ఎనర్జీ, ఐటీ, క్రీడా రంగాలపై ప్రత్యేక దృష్టి
(విశాఖపట్నం,న్యూస్ఇన్‌)
ఆంధ్రప్రదేశ్‌లో పెట్టుబడులు పెట్టే పారిశ్రామికవేత్తలకు ప్రభుత్వం పూర్తి సహకారం అందిస్తుందని ముఖ్యమంత్రి చంద్రబాబు నాయుడు స్పష్టం చేశారు. పరిశ్రమల ఏర్పాటుకు అవసరమైన అనుమతులను వేగంగా మంజూరు చేసేందుకు ప్రభుత్వ యంత్రాంగం సిద్ధంగా ఉందని, పారిశ్రామికవేత్తలకు ప్రభుత్వం ఒక్క ఫోన్ కాల్ దూరంలో ఉంటుందని భరోసా ఇచ్చారు.
విశాఖపట్నంలో జరుగుతున్న సీఐఐ భాగస్వామ్య సదస్సు సందర్భంగా ఆర్‌పీఎస్‌జీ గ్రూప్ మేనేజింగ్ డైరెక్టర్ శాశ్వత్ గోయెంకా ముఖ్యమంత్రి చంద్రబాబుతో భేటీ అయ్యారు. ఈ సందర్భంగా రాష్ట్రంలో పెట్టుబడుల అవకాశాలు, తమ సంస్థ కార్యకలాపాల విస్తరణపై చర్చించారు.
గ్రీన్ ఎనర్జీ, ఐటీ రంగాల్లో పెట్టుబడులకు ఆహ్వానం
ఏ ప్రాంతమైనా అభివృద్ధి చెందాలంటే నాయకత్వానికి స్పష్టమైన దార్శనికత, నిర్ణయాలు తీసుకునే సామర్థ్యం ఉండాలని చంద్రబాబు పేర్కొన్నారు. ఏపీలో గ్రీన్ ఎనర్జీ, ఐటీ సేవలు, క్రీడలు, వస్త్రాలు, ఫ్యాషన్ రంగాల్లో పెట్టుబడులకు అపార అవకాశాలు ఉన్నాయని వివరించారు.ఆర్‌పీఎస్‌జీ గ్రూప్‌కు చెందిన పుర్వా గ్రీన్ పవర్ ఇప్పటికే రాష్ట్రంలో 349.8 మెగావాట్ల పవన విద్యుత్ ప్రాజెక్టును చేపట్టిందని, ఇందుకోసం సుమారు రూ.3,286 కోట్ల పెట్టుబడులు పెడుతోందని గుర్తుచేశారు. దీనికి అదనంగా సౌర విద్యుత్, బ్యాటరీ ఎనర్జీ స్టోరేజ్ సిస్టమ్స్ (BESS), గ్రీన్ హైడ్రోజన్ రంగాల్లోనూ పెట్టుబడులు పెట్టే అవకాశాలను పరిశీలించాలని కోరారు.
విశాఖ, తిరుపతికి ఐటీ కార్యకలాపాల విస్తరణ
ప్రస్తుతం విజయవాడలోని మేధా ఐటీ టవర్‌లో కార్యకలాపాలు నిర్వహిస్తున్న ఫస్ట్‌సోర్స్ సంస్థను విశాఖపట్నం, తిరుపతికి విస్తరించే అవకాశాలను పరిశీలించాలని సీఎం సూచించారు. ప్రభుత్వ సంక్షేమ పథకాలతో పాటు సామాజిక బాధ్యతగా చేపట్టిన పీ4 కార్యక్రమంలోనూ ఆర్‌పీఎస్‌జీ గ్రూప్ భాగస్వామ్యం కావాలని, పేదలకు చేయూత అందించాలని కోరారు.
ఏపీ సహకారం దేశానికే ఆదర్శం
ఏపీలో పారిశ్రామికవేత్తలకు, పెట్టుబడిదారులకు లభిస్తున్న సహకారం దేశంలో మరెక్కడా లేదని శాశ్వత్ గోయెంకా ప్రశంసించారు. పెట్టుబడుల విషయంలో ఆంధ్రప్రదేశ్ ఇతర రాష్ట్రాలకు ఆదర్శంగా నిలుస్తోందన్నారు. సీఐఐ సదస్సులో చంద్రబాబు వివరించిన రాష్ట్ర వనరులు, పెట్టుబడి అవకాశాల ప్రజెంటేషన్ ఆకట్టుకుందని తెలిపారు. ఏపీలో పెట్టుబడులు పెట్టడంతో పాటు తమ సంస్థ కార్యకలాపాలను విస్తరించేందుకు సిద్ధంగా ఉన్నామని వెల్లడించారు.