తెలంగాణా ఆల‌యాలు డిజిట‌లైజేష‌న్

(హైద‌రాబాద్,న్యూస్ఇన్‌)

తెలంగాణాలోని ఆల‌యాల్లో డిజిట‌లైజేష‌న్ చేపట్టేందుకు ప్ర‌భుత్వం సిద్దం అవుతోంది. మంత్రి కొండా సురేఖ నిర్వ‌హించిన స‌మీక్ష స‌మావేశాలు ఈ నిర్ణ‌యం తీసుకున్నారు. దేవాదాయ శాఖలో సాంకేతికత ఆధారిత పరిపాలనకు ప్రభుత్వం అత్యంత ప్రాధాన్యత ఇస్తున్నదని, భక్తులకు వేగవంతమైన, పారదర్శకమైన సేవలు అందించడమే ప్రభుత్వ లక్ష్యమని మంత్రి కొండా సురేఖ అన్నారు. రాష్ట్ర దేవాదాయ శాఖలో పారదర్శకత, జవాబుదారీతనం, సమర్థవంతమైన పరిపాలన లక్ష్యంగా అమలు చేస్తున్న TAIMS (Temple Administration Information Management System- దేవాలయ పరిపాలన సమాచార నిర్వహణ వ్యవస్థ), యాదగిరి ట్రస్ట్ బోర్డు చట్టంకు సంబంధించిన ముసాయిదా నియమావళి పై దేవాదాయ శాఖ మంత్రి కొండా సురేఖ బంజారాహిల్స్ లోని మినిస్టర్ క్యాంపు కార్యాలయంలో సమీక్ష సమావేశం నిర్వహించారు.

దేవాలయ పరిపాలన సమాచార నిర్వహణ వ్యవస్థ (TAIMS) ద్వారా రాష్ట్రంలోని దేవాలయాల పరిపాలనను పూర్తిస్థాయిలో డిజిటలీకరించే దిశగా చేపడుతున్న చర్యలు, వివిధ మాడ్యూళ్ల రూపకల్పన, ఎదురయ్యే సమస్య, వాటి పరిష్కార మార్గాలపై మంత్రి సురేఖ అధికారులతో చర్చించారు. ఆలయాల పరిపాలన, ఉద్యోగుల అందిస్తున్న సేవల వివరాలు, దేవాలయ భూములు, ఆస్తుల నిర్వహణ, ఆదాయ వ్యయాల నమోదు, ఈ-ఆఫీస్ విధానం, భక్తులకు అందించే సేవలను మరింత వేగవంతంగా, పారదర్శకంగా అందించేందుకు TAIMS ను సమర్థవంతంగా వినియోగించే అంశాలపై అధికారులు ఇచ్చిన ప్రజెంటేషన్ ప‌రిశీలించి పలు సూచనలు చేశఆరు.

ఈ సందర్భంగా మంత్రి కొండా సురేఖ మాట్లాడుతూ, దేవాదాయ శాఖలో సాంకేతికత ఆధారిత పరిపాలనకు ప్రభుత్వం అత్యంత ప్రాధాన్యత ఇస్తున్నదన్నారు. సామాన్య భక్తులే లక్ష్యంగా వేగవంతమైన, పారదర్శకమైన సేవలు అందించడమే ప్రభుత్వ లక్ష్యమని తెలిపారు. TAIMS వ్యవస్థను పరిపాలనలో నాణ్యతను పెంచేలా మరింత సమర్థవంతంగా తీర్చిదిద్దాలని మంత్రి సురేఖ అధికారులను ఆదేశించారు. క్షేత్రస్థాయిలో పనిచేసే సిబ్బందికి అవసరమైన శిక్షణ కార్యక్రమాలు చేపట్టాలని, ఇందుకు తగిన కార్యాచరణ ప్రణాళికలను అమలు చేయాలని అధికారులకు దిశా నిర్దేశం చేశారు. డిజిటల్ విధానాల ద్వారా దేవాదాయ శాఖను మరింత ఆధునికీకరించి, ప్రజలకు మెరుగైన సేవలు అందించేలా కార్యాచరణ కొనసాగించాలని మంత్రి సురేఖ స్పష్టం చేశారు.