BREAKING NEWS
తాజా వార్తలు లోడ్ అవుతున్నాయి...
క్రైం - లీగ‌ల్తెలంగాణబిజినెస్

డిఫాల్టర్ రైస్ మిల్లర్లకు సుప్రీంకోర్టులో ఎదురుదెబ్బ:పిటిషన్లు కొట్టివేత

హైకోర్టు ఉత్తర్వులపై సవాల్ చేసినా ఫలితం శూన్యం

(హైదరాబాద్, న్యూస్ఇన్)

ధాన్యం కస్టమ్ మిల్లింగ్ బియ్యం (సీఎంఆర్) బకాయిల వ్యవహారంలో డిఫాల్టర్ రైస్ మిల్లర్లకు సుప్రీంకోర్టులో ఎదురుదెబ్బ తగిలింది. తమపై నమోదైన కేసులను కొట్టివేయాలంటూ తెలంగాణ హైకోర్టు ఇచ్చిన తీర్పును సవాల్ చేస్తూ పలువురు మిల్లర్లు దాఖలు చేసిన స్పెషల్ లీవ్ పిటిషన్లను సుప్రీంకోర్టు కొట్టివేసింది. నవంబర్ 20న ఈ మేరకు ఉత్తర్వులు వెలువడ్డాయి. దీంతో డిఫాల్టర్ మిల్లర్లపై నమోదైన కేసుల విచారణకు మార్గం సుగమమైంది.

540 ఎఫ్‌ఐఆర్‌ల నమోదు

రాష్ట్రంలో ధాన్యం సేకరణ, కస్టమ్ మిల్లింగ్ ప్రక్రియను తెలంగాణ రాష్ట్ర పౌర సరఫరాల సంస్థ (TGSCSCL) పర్యవేక్షిస్తోంది. ప్రభుత్వంతో ఒప్పందం చేసుకున్న రైస్ మిల్లర్లు కేటాయించిన ధాన్యాన్ని మర ఆడించి, నిర్ణీత పరిమాణంలో బియ్యాన్ని (CMR) తిరిగి ప్రభుత్వానికి అప్పగించాల్సి ఉంటుంది. రాష్ట్రవ్యాప్తంగా 2,200కు పైగా మిల్లులు ఈ ప్రక్రియలో భాగస్వాములుగా ఉన్నాయి.

RICE MILLING

అయితే కొందరు మిల్లర్లు ప్రభుత్వానికి అప్పగించాల్సిన ధాన్యం, బియ్యాన్ని బహిరంగ మార్కెట్‌కు తరలించినట్లు ఆరోపణలు వచ్చాయి. అధికారుల తనిఖీల్లో ఈ వ్యవహారాలు వెలుగులోకి రావడంతో 2024 నుంచి పోలీసులకు ఫిర్యాదులు చేయడం ప్రారంభించారు. ఈ క్రమంలో రాష్ట్రవ్యాప్తంగా డిఫాల్టర్ మిల్లర్లపై 540 ఎఫ్‌ఐఆర్‌లు నమోదయ్యాయి.

హైకోర్టు నుంచి సుప్రీంకోర్టు వరకు

తమపై నమోదైన ఎఫ్‌ఐఆర్‌లను రద్దు చేయాలని కోరుతూ పలువురు మిల్లర్లు తెలంగాణ హైకోర్టును ఆశ్రయించారు. ఈ పిటిషన్లపై విచారణ జరిపిన హైకోర్టు 2026 మేలో వాటిని కొట్టివేసింది. దీంతో కొందరు మిల్లర్లు హైకోర్టు ఉత్తర్వులను సవాల్ చేస్తూ సుప్రీంకోర్టులో స్పెషల్ లీవ్ పిటిషన్లు దాఖలు చేశారు. తాజాగా సుప్రీంకోర్టు కూడా ఆ పిటిషన్లను తోసిపుచ్చడంతో మిల్లర్లకు చుక్కెదురైంది.

PADDY IN A RICE MILL

బకాయిలు చెల్లించాల్సిందే

ప్రభుత్వానికి ఇవ్వాల్సిన సీఎంఆర్ బియ్యాన్ని తక్షణమే అప్పగించాలని, లేదంటే బకాయిలను చెల్లించాలని పౌర సరఫరాల సంస్థ డిఫాల్టర్ మిల్లర్లకు స్పష్టం చేసింది. రైస్ మిల్లుల పరిశ్రమకు ప్రభుత్వం అండగా ఉంటుందని, మిల్లర్ల న్యాయమైన సమస్యలను చర్చించేందుకు సిద్ధంగా ఉందని పేర్కొంది. అయితే ప్రభుత్వ ధాన్యాన్ని దుర్వినియోగం చేసినా, సీఎంఆర్ లేదా పీడీఎస్ బియ్యాన్ని అక్రమంగా మళ్లించినా కఠిన చర్యలు తప్పవని హెచ్చరించింది. అవసరమైతే రెవెన్యూ రికవరీ చట్టం కింద బకాయిల వసూలుకు చర్యలు చేపడతామని స్పష్టం చేసింది. ప్రభుత్వ ధాన్యం అక్రమ మళ్లింపుపై జీరో టాలరెన్స్ విధానం కొనసాగుతుందని వెల్లడించింది.

Leave a Reply

Your email address will not be published. Required fields are marked *