ఓట్ల తొలగింపుపై కాంగ్రెస్ శ్రేణులు అప్రమత్తంగా ఉండాలి: సీఎం రేవంత్ రెడ్డి
తెలంగాణలో ఓబీసీ కులగణన.. జనగణనలో అమలు చేయాలి
(హైదరాబాద్, న్యూస్ఇన్)
ఓట్ల తొలగింపు ప్రక్రియపై కాంగ్రెస్ పార్టీ శ్రేణులు అప్రమత్తంగా ఉండాలని ముఖ్యమంత్రి రేవంత్ రెడ్డి పిలుపునిచ్చారు. ఓటు హక్కును కాపాడుకునేందుకు ఎన్నికల వరకు వేచి చూడకుండా ఇప్పటి నుంచే క్షేత్రస్థాయిలో నిఘా పెట్టాలని పార్టీ బూత్ స్థాయి ఏజెంట్లకు సూచించారు. ఆదివారం గాంధీ భవన్లో జరిగిన కాంగ్రెస్ రాజకీయ వ్యవహారాల కమిటీ (పీఏసీ) సమావేశంలో ఆయన మాట్లాడారు.
బీఎం సందీప్కు సీఎం రేవంత్ స్వాగతం

తెలంగాణ నూతన పార్టీ ఇన్చార్జిగా నియమితులైన బీఎం సందీప్కు స్వాగతం పలికిన సీఎం.. ఆయన నియామకానికి సహకరించిన సోనియా గాంధీ, మల్లికార్జున ఖర్గే, రాహుల్ గాంధీలకు కృతజ్ఞతలు తెలిపారు. గతంలో మీనాక్షి నటరాజన్ ఇన్చార్జిగా ఉన్న సమయంలో ఉప ఎన్నికలు, పంచాయతీ, మున్సిపల్ ఎన్నికల్లో కాంగ్రెస్ మంచి ఫలితాలు సాధించిందని పేర్కొన్నారు. పంచాయతీ ఎన్నికల్లో 66 శాతం, మున్సిపల్ ఎన్నికల్లో 85 శాతం విజయాలు నమోదయ్యాయని చెప్పారు.
ఓబీసీ కులగణనపై కేంద్రానికి తీర్మానం
తెలంగాణలో వందేళ్ల తర్వాత తొలిసారిగా ఓబీసీ కులగణన చేపట్టామని రేవంత్ రెడ్డి వెల్లడించారు. 2027లో కేంద్రం నిర్వహించే జనగణనలోనూ ఓబీసీ కులగణన చేపట్టాలని డిమాండ్ చేస్తూ పీఏసీ సమావేశం నుంచి తీర్మానం చేయనున్నట్లు తెలిపారు. ఈ అంశంపై ప్రధానమంత్రికి లేఖ రాయాలని పీసీసీ అధ్యక్షుడు మహేష్ కుమార్ గౌడ్కు సూచించారు.
రూ.30 వేల కోట్లు కేంద్రం ఇవ్వాలి
మరోవైపు ఎల్నినో ప్రభావంతో వర్షాలు తగ్గి వ్యవసాయ రంగం ఇబ్బందులు ఎదుర్కొనే పరిస్థితి ఉందని సీఎం ఆందోళన వ్యక్తం చేశారు. రానున్న ఎనిమిది నెలల పాటు తాగునీటికి ఇబ్బందులు రాకుండా ప్రాజెక్టుల్లోని నీటిని జాగ్రత్తగా వినియోగించాల్సి ఉంటుందని చెప్పారు. ఎల్నినో ప్రభావాన్ని ఎదుర్కొనేందుకు రాష్ట్రానికి రూ.30 వేల కోట్ల ఆర్థిక సాయం అందించాలని కేంద్రాన్ని కోరనున్నట్లు వెల్లడించారు. తక్కువ నీటితో పండే పంటలను సాగు చేయాలని రైతులకు సూచించారు.

కాంగ్రెస్ శ్రేణులు అప్రమత్తంగా ఉండాలి
ఓటర్ల జాబితా ప్రత్యేక సమగ్ర సవరణ (SIR) ప్రక్రియపై మాట్లాడుతూ.. దేశవ్యాప్తంగా కోట్లాది ఓట్లు తొలగించే ప్రమాదం ఉందని ఆరోపించారు. తెలంగాణలో ఇప్పటికే 71 లక్షల ఓట్లను పక్కన పెట్టారని పేర్కొన్నారు. ముఖ్యంగా దళితులు, ఆదివాసీలు, గిరిజనులు, మహిళల ఓట్ల విషయంలో అప్రమత్తంగా ఉండాలని పార్టీ శ్రేణులకు సూచించారు.
ఐదు నెలలు ప్రజాబలం కార్యక్రమం
ప్రతి ఒక్కరికీ ఉపాధి కల్పించడమే లక్ష్యంగా ఐదు నెలల పాటు ప్రజాబలం కార్యక్రమాన్ని నిర్వహించనున్నట్లు సీఎం తెలిపారు. నాయకులు గ్రామాలకు వెళ్లి ప్రజల సమస్యలు తెలుసుకోవాలని, ఉపాధి కల్పనకు అవసరమైన నిధుల కొరత లేకుండా చూస్తామని చెప్పారు. పార్టీ కోసం పనిచేసిన వారికి ఇప్పటికే అనేక పదవులు కల్పించామని పేర్కొన్నారు.
