BREAKING NEWS
తాజా వార్తలు లోడ్ అవుతున్నాయి...
తాజా వార్త‌లుతెలంగాణరాజ‌కీయం

వచ్చే ఎన్నికల్లో 90 సీట్లు.. కోటి ఓట్లే లక్ష్యం: సీఎం రేవంత్ రెడ్డి

పనిచేసిన వారికే పదవులు.. సంక్రాంతి తర్వాత ప్రజల్లోకి కాంగ్రెస్ శ్రేణులు

(హైదరాబాద్, న్యూస్ఇన్)

వచ్చే అసెంబ్లీ ఎన్నికల్లో కాంగ్రెస్ పార్టీని మరోసారి అధికారంలోకి తీసుకురావడమే లక్ష్యంగా ప్రతి కార్యకర్త క్షేత్రస్థాయిలో పనిచేయాలని ముఖ్యమంత్రి రేవంత్ రెడ్డి పిలుపునిచ్చారు. గత ఎన్నికల్లో 3,700 ఓట్ల స్థాయి నుంచి 92 లక్షలకు పైగా ఓట్లు సాధించిన కాంగ్రెస్.. వచ్చే ఎన్నికల్లో కోటి ఓట్లతో 90 అసెంబ్లీ స్థానాలు గెలుచుకోవాలని లక్ష్యంగా పెట్టుకుందని ప్రకటించారు. గాంధీభవన్‌లో జరిగిన పార్టీ సమావేశంలో ఆయన కాంగ్రెస్ శ్రేణులను ఉద్దేశించి ప్రసంగించారు.

48 లక్షల సభ్యత్వంతో కార్యకర్తల్లో ఆత్మవిశ్వాసం

తాను పీసీసీ అధ్యక్షుడిగా బాధ్యతలు చేపట్టిన సమయంలో బీఆర్ఎస్ ఒత్తిళ్లు, అక్రమ కేసుల కారణంగా అనేక మంది కాంగ్రెస్ నాయకులు పార్టీని వీడాల్సి వచ్చిందని రేవంత్ రెడ్డి అన్నారు. ఆ సమయంలో 90 రోజుల్లోనే డిజిటల్ విధానంలో 48 లక్షల సభ్యత్వాలు నమోదు చేయించి దేశంలోనే కాంగ్రెస్‌కు అత్యధిక సభ్యత్వం సాధించామని గుర్తుచేశారు. పార్టీ కష్టకాలంలో జెండా మోసిన కార్యకర్తలకు గుర్తింపు ఇచ్చామని, పలువురికి ఎమ్మెల్యే, మంత్రి పదవులతో పాటు కార్పొరేషన్, ఎమ్మెల్సీ పదవులు కల్పించామని వివరించారు.

cm revanth attending the pac meeting

పార్టీ కోసం పనిచేసిన వారికే ప్రాధాన్యం

గాంధీభవన్, ఢిల్లీ చుట్టూ తిరిగితే పదవులు వస్తాయనుకోవడం పొరపాటని సీఎం వ్యాఖ్యానించారు. నాయకులు గ్రామాలు, తండాలు, పేదల వద్దకు వెళ్లాలని సూచించారు. ఎవరు పార్టీ కోసం ఎంత కష్టపడ్డారో ఎన్నికల సమయంలో లెక్క తేలుస్తామని, కష్టపడిన వారిని గుర్తిస్తామని స్పష్టం చేశారు. పార్టీ క్రమశిక్షణకు కట్టుబడి పనిచేస్తే పదవులు వాటంతట అవే వస్తాయని అన్నారు.

సంక్షేమ పథకాలతో ప్రజల్లోకి వెళ్లాలి

కాంగ్రెస్ ప్రభుత్వం అమలు చేస్తున్న సంక్షేమ పథకాలను ప్రజల్లోకి తీసుకెళ్లాలని కార్యకర్తలకు సూచించారు. మహిళలకు ఉచిత బస్సు ప్రయాణం కోసం ఆర్టీసీకి రూ.13 వేల కోట్లు చెల్లించామని, రూ.25 వేల కోట్ల రైతు రుణమాఫీ, రూ.36 వేల కోట్ల రైతు భరోసా నిధులు అందించామని తెలిపారు. 95 వేల కోట్ల రూపాయలతో ధాన్యం కొనుగోళ్లు చేపట్టామని, 8 లక్షల ఇందిరమ్మ ఇళ్లను మంజూరు చేశామని చెప్పారు. 52 లక్షల కుటుంబాలకు ఉచిత విద్యుత్, 3.42 కోట్ల మందికి సన్నబియ్యం పంపిణీ చేస్తున్నట్లు వివరించారు.

కులగణన, సామాజిక న్యాయానికి ప్రాధాన్యం

congress pac meeting

తెలంగాణలో 95 ఏళ్ల తర్వాత కులగణన నిర్వహించి దేశానికి ఆదర్శంగా నిలిచామని రేవంత్ రెడ్డి పేర్కొన్నారు. ఎస్సీ వర్గీకరణ అమలుతో ఉపకులాల మధ్య సఖ్యతకు కృషి చేశామని, గిగ్ వర్కర్ల కోసం చట్టం తీసుకొచ్చిన తొలి రాష్ట్రం తెలంగాణ అని చెప్పారు. బలహీన వర్గాల మహనీయులకు గౌరవం కల్పించేలా విగ్రహాలు ఏర్పాటు చేస్తున్నామని వివరించారు.

రాహుల్ గాంధీని ప్రధానిని చేయడమే లక్ష్యం

సంక్రాంతి తర్వాత ప్రజల్లోకి వెళ్లి పార్టీని మరింత బలోపేతం చేసే కార్యక్రమాలు చేపడతామని సీఎం ప్రకటించారు. తెలంగాణ నుంచి 15 ఎంపీ స్థానాలు గెలిచి రాహుల్ గాంధీని ప్రధానిని చేసే బాధ్యతను కాంగ్రెస్ నాయకులు, కార్యకర్తలు తీసుకోవాలని పిలుపునిచ్చారు. రాష్ట్రంలో వరుసగా రెండోసారి కాంగ్రెస్ ప్రభుత్వాన్ని ఏర్పాటు చేయడమే కాకుండా, పదేళ్లపాటు అధికారంలో కొనసాగేలా పనిచేయాలని శ్రేణులకు దిశానిర్దేశం చేశారు.

Leave a Reply

Your email address will not be published. Required fields are marked *