సోనియా గాంధీ జీవితంపై తెలుగులో సినిమా.. జగ్గారెడ్డి ప్రకటన

-సంగారెడ్డి కాంగ్రెస్ నాయకులు, కార్యకర్తలే నిర్మాతలు

-రూ.2 కోట్ల విరాళం ప్రకటించిన జులకంటి ఆంజనేయులు

-50 మందితో సినిమా నిర్మాణ కమిటీ ఏర్పాటు

(సంగారెడ్డి, న్యూస్ ఇన్)

కాంగ్రెస్ అగ్రనేత సోనియాగాంధీ స్వయంగా రాసిన ‘బిలాంగింగ్: ఎ జర్నీ ఆఫ్ లవ్’ పుస్తకం ఆధారంగా ఆమె జీవిత చరిత్రను తెలుగులో సినిమాగా తెరకెక్కించనున్నట్లు టీపీసీసీ వర్కింగ్ ప్రెసిడెంట్ జగ్గారెడ్డి ప్రకటించారు. సంగారెడ్డిలో నిర్వహించిన కాంగ్రెస్ కార్యకర్తల సమావేశంలో ఆయన ఈ విషయాన్ని వెల్లడించారు. ఈ సినిమా నిర్మాణంలో సంగారెడ్డి నియోజకవర్గ కాంగ్రెస్ నాయకులు, కార్యకర్తలే భాగస్వాములు కావాలని పిలుపునిచ్చారు. సినిమా నిర్మాణానికి నియోజకవర్గ కాంగ్రెస్ కన్వీనర్ జులకంటి ఆంజనేయులు రూ.2 కోట్లు విరాళంగా ప్రకటించారు.

50 మందితో నిర్మాణ కమిటీ….

సినిమా నిర్మాణం కోసం 50 మందితో ప్రత్యేక కమిటీ ఏర్పాటు చేయనున్నట్లు జగ్గారెడ్డి తెలిపారు. ఈ కమిటీని గాంధీ భవన్ పీఆర్వో హరిప్రసాద్ పర్యవేక్షిస్తారని వెల్లడించారు. నాయకులు, కార్యకర్తలు నిధులు సమకూర్చుకోవాలని సూచించారు. బడ్జెట్ సిద్ధం చేసి, మంచి దర్శకుడిని ఎంపిక చేస్తామని చెప్పారు. ఏర్పాట్లు పూర్తయ్యాక సీఎం రేవంత్‌రెడ్డి, టీపీసీసీ అధ్యక్షుడు మహేశ్‌కుమార్ గౌడ్ చేతుల మీదుగా సినిమా షూటింగ్ ప్రారంభిస్తామని పేర్కొన్నారు.

సోనియా రాజకీయ ప్రస్థానం తెరపైకి…

ఇందిరాగాంధీ కోడలిగా, రాజీవ్‌గాంధీ భార్యగా, రాహుల్‌గాంధీ, ప్రియాంకాగాంధీల తల్లిగా సోనియాగాంధీ జీవితంలోని కీలక ఘట్టాలను సినిమాలో చూపించనున్నట్లు జగ్గారెడ్డి వివరించారు. కుటుంబం ఎదుర్కొన్న విషాదాలు, రాజకీయాల్లోకి ఆమె ప్రవేశం, పార్టీని నడిపించిన తీరు వంటి అంశాలకు ప్రాధాన్యం ఇస్తామన్నారు.

ప్రధాని అయ్యే అవకాశం ఉన్నప్పటికీ ఆ పదవిని స్వీకరించకుండా మన్మోహన్‌సింగ్‌కు అవకాశం కల్పించడం సోనియాగాంధీ రాజకీయ జీవితంలో చరిత్రాత్మక నిర్ణయమని జగ్గారెడ్డి వ్యాఖ్యానించారు. రాహుల్, ప్రియాంకలను దేశ రాజకీయాల్లో ముందుకు నడిపించడంలో సోనియాగాంధీ పాత్ర కీలకమని పేర్కొన్నారు. ఆమె జీవితాన్ని, రాజకీయ ప్రస్థానాన్ని కార్యకర్తలకు మరింత చేరువ చేసేందుకు పుస్తక ప్రతులను సైతం పంపిణీ చేస్తామని తెలిపారు.