తాజా వార్త‌లుతెలంగాణారాజ‌కీయం

సిద్దిపేటలో టీఆర్ఎస్ జెండా ఎగురవేస్తాం

-హరీశ్ రావు అవినీతిని ప్రజల్లోకి తీసుకెళ్తాం: కల్వకుంట్ల కవిత

(మెదక్,న్యూస్ఇన్)

సిద్దిపేట రాజకీయాల్లో మార్పు తీసుకొస్తామని, వచ్చే ఎన్నికల్లో ఇక్కడ తెలంగాణ రక్షణ సేన (టీఆర్ఎస్) జెండా ఎగురవేయడం ఖాయమని ఆ పార్టీ చీఫ్ కల్వకుంట్ల కవిత ధీమా వ్యక్తం చేశారు. పదేళ్ల బీఆర్ఎస్ పాలనలో సిద్దిపేట అభివృద్ధి పేరుతో భారీ అవినీతి జరిగిందని, మాజీ మంత్రి హరీశ్ రావు అక్రమాలపై సమాధానం చెప్పాల్సిందేనని డిమాండ్ చేశారు. ప్రజలు తమకు ఒక్క అవకాశం ఇస్తే పెండింగ్ ప్రాజెక్టులను పూర్తి చేయడంతో పాటు ఉచిత విద్య, మెరుగైన వైద్య సేవలకు ప్రాధాన్యం ఇస్తామని ప్రకటించారు. సిద్దిపేటలోని రంగధాంపల్లి చౌరస్తాలో అమరవీరుల స్తూపం సమీపంలో తెలంగాణ రక్షణ సేన పార్టీ కార్యాలయ నిర్మాణానికి కవిత తన భర్త అనిల్‌తో కలిసి భూమిపూజ చేశారు. అంతకుముందు కోటిలింగేశ్వర స్వామి ఆలయంలో ప్రత్యేక పూజలు నిర్వహించారు. అనంతరం మీడియాతో మాట్లాడుతూ హరీశ్ రావుపై పలు ఆరోపణలు చేశారు.

మల్లన్న సాగర్ నిర్మాణంపై ప్రశ్నలు

మల్లన్న సాగర్ రిజర్వాయర్ నిర్మాణ సమయంలో భూకంప ముప్పు అంశంపై ఎన్‌జీఆర్ఐ హెచ్చరికలను అప్పటి ప్రభుత్వం పట్టించుకోలేదని కవిత ఆరోపించారు. ప్రాజెక్టు అంచనా వ్యయాన్ని రూ.6 వేల కోట్ల నుంచి రూ.9 వేల కోట్లకు పెంచారని విమర్శించారు. రిజర్వాయర్ పనుల్లో నాణ్యతా లోపాలు, లీకేజీల అంశాలను పక్కదారి పట్టించేందుకే ఇటీవల బ్లాస్టింగ్‌లపై హరీశ్ రావు ఆరోపణలు చేస్తున్నారని అన్నారు. కొండపోచమ్మ సాగర్ పనుల్లోనూ డిజైన్ల మార్పులతో అదనపు వ్యయం జరిగిందని పేర్కొన్నారు.

నిమ్స్‌లో వంద కోట్ల అవినీతి…..

ఆరోగ్య శాఖ మంత్రిగా ఉన్న సమయంలో నిమ్స్ ఆసుపత్రిలో రూ.100 కోట్ల మేర అక్రమాలు జరిగాయని కవిత ఆరోపించారు. దీనికి సంబంధించిన ఆధారాలు, సమావేశాల వివరాలు తన వద్ద ఉన్నాయని చెప్పారు. ఈ వ్యవహారంపై విచారణ జరిపించాలని ఈ నెల 19న సిద్దిపేటకు రానున్న ముఖ్యమంత్రి రేవంత్ రెడ్డిని డిమాండ్ చేశారు. కొండపోచమ్మ సాగర్, బొగ్గు సరఫరా, భూముల వ్యవహారాల్లోనూ హరీశ్ రావు అవినీతికి పాల్పడ్డారని ఆరోపించారు. తాను చేసిన ఆరోపణలకు సమాధానం చెప్పకుండా మౌనంగా ఉంటే ప్రజలే తగిన సమాధానం చెబుతారని వ్యాఖ్యానించారు.

బీఆర్ఎస్ పాలనపై విమర్శలు…

Trs chief kavita bhumipooja in Siddipet

కాళేశ్వరం ప్రాజెక్టు కోసం రూ.93 వేల కోట్లు ఖర్చు చేసినప్పటికీ ఉమ్మడి మెదక్ జిల్లాలో లక్ష ఎకరాలకే నీరు అందుతోందని కవిత విమర్శించారు. పదేళ్ల పాలనలో సిద్దిపేటకు ఆశించిన స్థాయిలో అభివృద్ధి జరగలేదన్నారు. అమరవీరుల కుటుంబాలకు పూర్తిస్థాయిలో న్యాయం చేయలేదని ఆవేదన వ్యక్తం చేశారు. బీఆర్ఎస్ కుటుంబంలో సభ్యురాలిగా ఉన్నప్పటికీ ఆ పార్టీ పాలనలో జరిగిన అవినీతిలో తనకు ఎలాంటి భాగస్వామ్యం లేదని స్పష్టం చేశారు. తన పేరుపై ప్రకటించిన ఆస్తులకు మించి ఒక్క గజం భూమి ఉన్నా ప్రభుత్వానికి రాసిస్తానని సవాల్ చేశారు.

పెండింగ్ ప్రాజెక్టులే తొలి ప్రాధాన్యం….

కాంగ్రెస్ ప్రభుత్వంపైనా కవిత విమర్శలు గుప్పించారు. ఎన్నికల సమయంలో ఇచ్చిన హామీలను అమలు చేయడంలో ప్రభుత్వం విఫలమైందన్నారు. బీఆర్ఎస్‌కు రెండుసార్లు, కాంగ్రెస్‌కు ఒకసారి అవకాశం ఇచ్చిన ప్రజలు తమ పార్టీకి కూడా ఒక్కసారి అవకాశం ఇవ్వాలని కోరారు. అధికారంలోకి వస్తే పెండింగ్ ప్రాజెక్టులను పూర్తి చేస్తామని, ఉచిత విద్య, నాణ్యమైన వైద్య సేవలు అందిస్తామని చెప్పారు. ప్రజా సమస్యలే ఎజెండాగా పాంచజన్యం పేరుతో ఐదు ప్రధాన అంశాలను రూపొందించామని తెలిపారు.

సిద్దిపేట తన సొంత ఊరని, ఇక్కడి ప్రజలతో తనకు ప్రత్యేక అనుబంధం ఉందని కవిత పేర్కొన్నారు. రాబోయే మున్సిపల్ ఎన్నికల నుంచే తమ రాజకీయ పోరాటాన్ని ప్రారంభిస్తామని, సిద్దిపేటలో పార్టీ బలోపేతానికి కృషి చేస్తామని వెల్లడించారు. పార్టీ కార్యాలయ భూమిపూజ అనంతరం అమరవీరుల స్తూపం వద్ద నివాళులర్పించి, సీఎస్ఐ చర్చి, జానుల్లా షా దర్గాను సందర్శించారు.

Leave a Reply

Your email address will not be published. Required fields are marked *