BREAKING NEWS
తాజా వార్తలు లోడ్ అవుతున్నాయి...
తాజా వార్త‌లుతెలంగాణరాజ‌కీయం

కాంగ్రెస్‌కు కౌంట్‌డౌన్ మొదలైంది … కేటీఆర్

2028లో కేసీఆరే సీఎం

వచ్చే ఎన్నికల్లో 90 సీట్లు గెలుస్తామని ధీమా

(వరంగల్, న్యూస్ ఇన్)

తెలంగాణలో కాంగ్రెస్ ప్రభుత్వానికి కౌంట్ డౌన్ మొద‌లైంద‌ని,2028లో కేసీఆర్ మళ్లీ ముఖ్యమంత్రి కావడం ఖాయమని బీఆర్ఎస్ వర్కింగ్ ప్రెసిడెంట్ కేటీఆర్ ధీమా వ్యక్తం చేశారు. కాంగ్రెస్ పాలనలో అభివృద్ధి కుంటుపడిందని, సంక్షేమ పథకాలు అమలుకు నోచుకోవడం లేదని విమర్శించారు. వరంగల్ కాకతీయ డిగ్రీ కళాశాల మైదానంలో నిర్వహించిన జనచైతన్య సభలో ఆయన ప్రసంగించారు.

హామీల అమలులో వైఫల్యం

కాంగ్రెస్ అధికారంలోకి వచ్చి మూడేళ్లు గడుస్తున్నా ప్రజలకు ఇచ్చిన హామీలను నెరవేర్చలేదని కేటీఆర్ ఆరోపించారు. రాష్ట్రంలో అవినీతి పెరిగిపోయిందని, సొంత పార్టీ ఎమ్మెల్యేలే కమీషన్ల వ్యవహారాలపై ఆరోపణలు చేస్తున్నారని అన్నారు. మహిళలకు నెలకు రూ.2,500 ఇస్తామని హామీ ఇచ్చి అమలు చేయలేదని, ఒక్కో మహిళకు రూ.85,500 బకాయి పడ్డారని పేర్కొన్నారు. ఇతర హామీలతో కలిపి రూ.1.50 లక్షలు చెల్లించాలని డిమాండ్ చేశారు. పెన్షన్లు పెంచకపోగా 4.71 లక్షల మందికి కోత విధించారని విమర్శించారు.

brs warangal jana chaitanya sabha

వరంగల్ అభివృద్ధిని కాంగ్రెస్ విస్మరించింది

కేసీఆర్ హయాంలో వరంగల్‌ను ఐటీ, వైద్య, పారిశ్రామిక కేంద్రంగా తీర్చిదిద్దేందుకు చర్యలు చేపట్టామని కేటీఆర్ గుర్తుచేశారు. ఆరు ప్రభుత్వ మెడికల్ కాలేజీలు, కాకతీయ మెగా టెక్స్‌టైల్ పార్కు, మడికొండ ఐటీ పార్కు ద్వారా ఉపాధి అవకాశాలు కల్పించామని తెలిపారు. 2,250 పడకలతో నిర్మిస్తున్న సూపర్ స్పెషాలిటీ ఆసుపత్రి పనులు 90 శాతం పూర్తయ్యాయని, మిగిలిన పనులను కూడా కాంగ్రెస్ ప్రభుత్వం పూర్తి చేయలేకపోతోందని ఆరోపించారు. ఫ్యూచర్ సిటీ ప్రచారం కంటే భవిష్యత్తు అవకాశాలున్న వరంగల్‌పై ప్రభుత్వం దృష్టి పెట్టాలని సూచించారు.

కాంగ్రెస్‌కు కౌంట్‌డౌన్

కాంగ్రెస్ ప్రభుత్వ వైఫల్యాలను ప్రజల్లోకి తీసుకెళ్లాలని పార్టీ శ్రేణులకు కేటీఆర్ పిలుపునిచ్చారు. రాబోయే ఎమ్మెల్సీ, వరంగల్ మున్సిపల్ కార్పొరేషన్ ఎన్నికల్లో కాంగ్రెస్, బీజేపీలకు ప్రజలు తగిన బుద్ధి చెప్పాలని అన్నారు. తెలంగాణ ఉద్యమంలో వరంగల్ అందించిన సహకారాన్ని గుర్తుచేస్తూ, ఓరుగల్లు ప్రజలు మరోసారి బీఆర్ఎస్‌కు అండగా నిలవాలని కోరారు. కాంగ్రెస్ ప్రభుత్వానికి ఇంకా 500 రోజులే మిగిలి ఉన్నాయని, 2028లో కేసీఆర్ తిరిగి ముఖ్యమంత్రి అవుతారని ధీమా వ్యక్తం చేశారు. జనచైతన్య సభలో పలువురు నాయకులు బీఆర్ఎస్‌లో చేరారు.

Leave a Reply

Your email address will not be published. Required fields are marked *