బీజేపీని అడ్డుకునే శక్తి కాంగ్రెస్కు లేదు:బండి సంజయ్
(కరీంనగర్,న్యూస్ఇన్)
ఓటర్ల జాబితా ప్రత్యేక సమగ్ర సవరణ (ఎస్ఐఆర్/SIR) ప్రక్రియను కాంగ్రెస్ పార్టీ వ్యతిరేకించడంపై కేంద్ర హోంశాఖ సహాయ మంత్రి బండి సంజయ్ తీవ్రంగా స్పందించారు. ఈ ప్రక్రియను అడ్డుకునే ప్రయత్నాలు చేసేవారు దేశ ప్రయోజనాలకు విరుద్ధంగా వ్యవహరిస్తున్నారని విమర్శించారు. విదేశీ అక్రమ చొరబాటుదారులకు ఓటు హక్కు కల్పించాలని కోరడం మూర్ఖత్వమని వ్యాఖ్యానించారు. దేశంలో ప్రధాని, ముఖ్యమంత్రులు మొదలు ప్రజాప్రతినిధుల వరకు ఎవరు ఉండాలో నిర్ణయించే అధికారం భారతీయ ఓటర్లకే ఉందని స్పష్టం చేశారు.
కరీంనగర్లోని ఆయన మీడియాతో మాట్లాడారు. కాంగ్రెస్, బీఆర్ఎస్ రాజకీయంగా ఒక్కటై బీజేపీని అడ్డుకునేందుకు ప్రయత్నిస్తున్నాయని ఆరోపించారు. బీజేపీ బలాన్ని చూసి సీఎం రేవంత్ రెడ్డి భయపడుతున్నారని, కాంగ్రెస్కు బీజేపీని ఎదుర్కొనే సత్తా లేదని అన్నారు. తెలంగాణలో బీజేపీ అధికారంలోకి రావడం ఖాయమని, రాబోయే ఎన్నికల్లో డబుల్ ఇంజిన్ ప్రభుత్వం ఏర్పడుతుందని ధీమా వ్యక్తం చేశారు.
ఓటర్ల జాబితాలో అర్హులైన వారందరికీ స్థానం కల్పించడం, మరణించిన వారి పేర్లు, ఒకటి కంటే ఎక్కువ ఓట్లు ఉన్నవారి పేర్లను తొలగించడం, అక్రమంగా ఓటు హక్కు పొందినవారిని గుర్తించడం ఎస్ఐఆర్ లక్ష్యమని బండి సంజయ్ వివరించారు. ఈ అంశంపై ప్రజలకు అవగాహన కల్పించేందుకే బీజేపీ దేశవ్యాప్తంగా మహా పాదయాత్రలు నిర్వహిస్తోందన్నారు.
సిక్కు సమాజం దేశానికి అందించిన సేవలను కొనియాడిన ఆయన, స్వాతంత్ర్య పోరాటంలోనూ, సరిహద్దుల రక్షణలోనూ వారి పాత్ర చిరస్మరణీయమన్నారు. తెలంగాణలో సిక్కు కుటుంబాలు ఇళ్లు, ఉపాధి, విద్య వంటి సమస్యలతో ఇబ్బందులు పడుతున్నాయని, బీజేపీ అధికారంలోకి వస్తే వారి సంక్షేమానికి ప్రాధాన్యత ఇస్తామని హామీ ఇచ్చారు. యువత డ్రగ్స్కు దూరంగా ఉండాలని, మాదకద్రవ్యాల వ్యతిరేక పోరాటంలో అందరూ భాగస్వాములు కావాలని పిలుపునిచ్చారు.
కాగా, బీజేపీ జాతీయ అధ్యక్షుడు నితిన్ నబిన్ కరీంనగర్ పర్యటనలో భాగంగా నిర్వహించనున్న మహా పాదయాత్రకు భారీగా ప్రజలు తరలిరావాలని బండి సంజయ్ కోరారు.
