బీఆర్ఎస్ లో ఈట‌ల‌-కాంగ్రెస్ లో కొండా సురేఖ‌- సీన్ రిపీట్

(న్యూస్ఇన్, హైద‌రాబాద్)

కొండా సురేఖ ఎపిసోడ్ ఎండ్ కార్డు వ‌ర‌కు చేరుకుంటోంది. అతి త్వ‌ర‌లో కొండా సురేఖ‌పై చ‌ర్య‌లు తీసుకునేందుకు కాంగ్రెస్ హై క‌మాండ్ సిద్దం అవుతోంది. ఇదే స‌మ‌యంలో హై క‌మాండ్ నిర్ణ‌యానికి ముందే కొండా సురేఖ రాజీనామా చేసేందుకు సిద్ధ‌మ‌వుతున్నార‌న్న ప్ర‌చారం జ‌రుగుతోంది. తాజా రాజ‌కీయ ప‌రిస్థితుల నేప‌థ్యంలో తెలంగాణా రాజ‌కీయాల్లో కొత్త చ‌ర్చ మొద‌లైంది.

ఈట‌ల ఎపిసోడ్….

గ‌త బీఆర్ ఎస్ ప్ర‌భుత్వంలో అప్ప‌టి ముఖ్య‌మంత్రి క‌ల్వ‌కుంట్ల చంద్ర‌శేఖ‌ర్ రావ్ తో ఉద్య‌మ స‌మ‌యం నుంచి ఎంతో స‌న్నిహితంగా ఉన్నా ఈట‌ల రాజేంద‌ర్ ఎపిసోడ్ తెర‌పైకి వ‌స్తోంది. ఈట‌ల రాజేంద‌ర్ ఉద్య‌మ స‌మ‌యం నుంచి గులాబీ పార్టీలో కీల‌క పాత్ర పోషించారు. ప్ర‌భుత్వం ఏర్పాటైన త‌రువాత కీల‌క శాఖ‌ల‌కు మంత్రిగా వ్య‌వ‌హ‌రించారు. కానీ రెండో విడ‌త బీఆర్ ఎస్ స‌ర్కార్ ఏర్పాటైన త‌రువాత ఆయ‌న చేసిన వ్యాఖ్య‌లు గులాబీ పార్టీని ఇబ్బందుల్లోకి నెట్టాయి. దీంతో ఈట‌ల విష‌యంలో కేసీఆర్ సీరియ‌స్ అయ్యారు. రాజ‌కీయంగా కేసీఆర్ ను ఇరుకున పెట్టేలా చేసిన వ్యాఖ్య‌ల ప‌రిణామాల‌ను ఈట‌ల ఎదుర్కోవాల్సి వ‌చ్చింది. మంత్రి వ‌ర్గం నుంచి ఈట‌ల‌ను తొల‌గించ‌డంతో ఆయ‌న ఎమ్మెల్యే ప‌ద‌వికి రాజీనామా చేయాల్సిన ప‌రిస్థితి వ‌చ్చింది.

కొండా సురేఖ ఎపిసోడ్…

ఇప్పుడు కూడా దాదాపు అదే సీన్ రిపీట్ అయ్యేలా క‌నిపిస్తోంది. కొండా కుటుంబం దివంగ‌త మాజీ సీఎం వైఎస్ రాజ‌శేఖ‌ర్ రెడ్డి అనుంగు అనుచ‌రులుగా రాజ‌కీయాల్లో గుర్తింపు పొందారు. మారిన రాజ‌కీయ ప‌రిస్థితుల్లో 2014 ఎన్నికల్లో బీఆర్ ఎస్ లో చేరి ఆమె పోటీ చేసి విజ‌యం సాధించారు. త‌న కూతురుకు అవ‌కాశం క‌ల్పించాల‌న్న డిమాండ్ ను బీఆర్ ఎస్ తిర‌స్క‌రించ‌డంత‌….అక్క‌డి నుంచి 2023 ఎన్నిక‌ల నాటికి తిరిగి కాంగ్రెస్ పార్టీలో చేరి టికెట్ ద‌క్కించుకున్నారు. ఇప్పుడు కూతురు కు కాంగ్రెస్ లో అవ‌కాశం కోసం ఎన్నిక‌ల‌కు రెండేళ్లు ముందుగానే పావులు క‌దిపారు. కొండా సుష్మిత స్వ‌యంగా రంగంలోకి దిగి….ముఖ్య‌మంత్రి రేవంత్ రెడ్డి కి స‌వాల్ చేసినంత ప‌ని చే|శారు. ఈ వ్యాఖ్య‌లు రాజకీయంగా దూమారం రేప‌డంతో కాంగ్రెస్ పార్టీ లో కొండా సురేఖ పై చ‌ర్య‌లు తీసుకోవాల‌న్న డిమాండ్ తారా స్థాయికి చేరుకుంది. సుష్మిత వ్యాఖ్య‌ల‌పై పీసీసీ వివ‌ర‌ణ కోరినా… సురేఖ వివ‌ర‌ణ ఇచ్చుకుంది.కానీ క్ర‌మ‌శిక్ష‌ణా సంఘం అన్ని అంశాల‌ను ప‌రిశీలించి కొండా సురేఖ‌పై చ‌ర్య‌ల‌కు సిఫార‌సు చేసింది అతి త్వ‌ర‌లో ఏఐసీసీ నిర్ణ‌యం కూడా వెల్ల‌డించ‌నుంది.

చక్రం తిప్పిన సీఎం….

అయితే ముఖ్య‌మంత్రి రేవంత్ రెడ్డి అంది వ‌చ్చిన అవ‌కాశాన్ని త‌న చేతుల‌కు ఏమాత్రం మ‌ట్టి అంట‌కుండా కొండా సురేఖ కు పులిస్టాప్ పెట్ట‌డంలో స‌క్సెస్ అయ్యారు. మంత్రి వ‌ర్గంలో స్థానం క‌ల్పించినా…. సీఎం కు కొండా సురేఖ కు పెద్ద‌గా స‌మ‌న్వ‌యం లేద‌న్న ప్ర‌చారం ఎప్ప‌టి నుంచో ఉంది. అవ‌కాశం రావ‌డంతో సీఎం వ్యూహాత్మ‌కంగా పావులు క‌దిపి కొండా కుటుంబానికి చెక్ పెట్టేలా పావులు క‌దిపారు. రాజ‌కీయంగా కొండా కుటుంబంతో వ్య‌తిరేకించే వ‌రంగ‌ల్ జిల్లాకు చెందిన నేత‌లంతా సీఎంకు అనుకూలంగా వ్య‌వ‌హ‌రించారు.

కొండా సైలెంట్ గా ఉంటుందా…

అయితే అప్ప‌ట్లో ఈట‌ల రాజేంద‌ర్ ను మంత్రి వ‌ర్గం నుంచి తొల‌గించ‌డంతో ఆయ‌న బీజేపీలో చేరి ఎలాగోలా త‌న స్థానాన్ని ఉప ఎన్నిక‌ల్లో కాపాడుకున్నారు. బీసీ నేత‌గా రాష్ట్ర స్థాయిలో గుర్తింపు ద‌క్క‌డంతో ఈట‌ల‌కు బీసీ సంఘాల‌న్నీ మ‌ద్దుతు నిచ్చాయి. ఇప్పుడు కూడా కొండా సురేఖ ను మంత్రి ప‌ద‌వి నుంచి త‌ప్పిస్తే సైలెంట్ గా ఉంటుందా…. రాజ‌కీయాల్లో ప‌ట్టు నిరూపించుకునేందుకు బీసీ అంశాన్ని తెర‌పైకి తెచ్చి కాంగ్రెస్ ను ఇర‌కాటంలో పెడుతుందా అన్న‌ది ఆస‌క్తి రేపుతోంది. కొండా సైలెంట్ అయితే వ‌చ్చే ఎన్నిక‌ల్లో ఆమె టికెట్ పొంద‌డ‌మే స‌మ‌స్య‌గా మారే అవ‌కాశం ఉంటుంది. తెలంగాణా బ‌ల‌మైన రెండు సామాజిక వ‌ర్గాలు ఆమెకు మ‌ద్ద‌తుగా నిలిస్తే.. సీఎం రేవంత్ తో ఢీ కొట్టి త‌న రాజ‌కీయ ప‌ట్టును నిలుపుకునేందుకు సిద్ధం అవుతున్న‌ట్లు తెలుస్తోంది.